Дар доираи дастуру ҳидоятҳои Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон оид ба баланд бардоштани сатҳи некӯаҳволии ҷомеа, бунёди боғу токзорҳо ва ба гардиши кишоварзӣ даровардани заминҳои тўли солҳо бекорхобида, бо иштироки ҳайатҳои роҳбариву фармондеҳии Вазорати мудофиаи кишвар ва бо ҷалби хизматчиёни ҳарбии сатҳу зинаҳои гуногуни Дастгоҳи марказиву Ситоди генералии Қувваҳои Мусаллаҳи мамлакат дар ҳудуди пойгоҳи яке аз қисмҳои низомии Қувваҳои ҳарбӣ-ҳавоӣ ва мудофиаи зидди ҳавоӣ ҳашари дастаҷамъонаи ниҳолшинонӣ доир карда шуд.
Иштирокчиёни ҳашари дастаҷамъона бо маслиҳату машварати мутахассисону масъулини хоҷагиҳои ёрирасон ва бо риояи қоидаҳои агросаноатӣ дар ҳудуди замини хоҷагҳоии ёрирасони назди Қувваҳои ҳарбӣ-ҳавоӣ ва мудофиаи зидди- ҳавоӣ, бо шинонидани дарахтони мевадиҳанда боғи 30 солагии Қувваҳои Мусаллаҳро бунёд намуданд.
Қобили зикр аст, ки тайи панҷ соли охир дар ҳудуди пойгоҳи ин навъи қўшун бо ҳашари дастаҷамъонаи ниҳолшинонӣ дар ҳудуди 16 гектар замин, боғи 30 солагии истиқлолият ва 25 солагии Артиши миллӣ низ бунёд карда шуда, дар онҳо асосан дарахтони ороишӣ ва навъҳои гуногуни ниҳолҳои мевадиҳанда, аз қабили зардолу, себ, гелос ва ғайра шинонида шуданд.
Бояд тазаккур дод, ки бунёди боғҳои мазкур аллакай самараи дилхоҳ ба бор оварда, қисмҳои низомии баландкӯҳи кишвар дар мавсими ҷамъоварии ҳосил бо меваҳои тару тоза ва дар фасли сармо бошад бо меваи хушк давоми сол таъмин карда мешаванд. Илова бар ин, аз ҳисоби меваҳои лазизи ҷамъовардашуда, барои сарбозон афшурдаи мураббо, шарбат ва дигар маҳсулоти истеъмолӣ истеҳсол мегардад.
Ташкилкунандгон ва иштирокчиёни ҳашари дастаҷамъона, ҳамчун меросбарон ва ҳимоятгарони тамомияти арзӣ ва фарҳангу тамаддуни миллӣ ин гуна корҳои созандагиву бунёдкориро дар ҳоле анҷом медиҳанд, ки имрўзҳо мардуми ориёинажод, пеш аз ҳама ҷомеаи Тоҷикистон бо ёдоварӣ аз арзишҳову унсурҳои аҷдодӣ ҷашни садаро, ки ба қавли фарҳангшиносон ҷашни Наврўз давоми мантиқии он аст, таҷлил менамоянд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
