Бахшида ба “Рӯзи Модар” дар “Кохи афсарон”-и Вазорати мудофиаи ҷумҳурӣ бо ибтикори масъулини ҲХДТ дар шаҳри Душанбе ва ноҳияи Исмоили Сомонии пойтахт ҳамоиши тантанавӣ таҳти унвони “Нақш ва ҷойгоҳи занон дар пойдории Қувваҳои Мусаллаҳи мамлакат” баргузор гардид, ки дар он занону бонувони Дастгоҳи марказии ин ниҳоди қудратӣ ва Ситоди генералии Қувваҳои Мусаллаҳ ширкат намуданд.
Дар оғози ҷамъомад намояндагони ҲХДТ ва дигар ҳайати иштирокчиён доир ба ғамхорӣ ва таваҷҷӯҳи доимии Сарфармондеҳи Олии Қувваҳои Мусаллаҳ нисбат ба низомиён, саҳми модарон ва занону бонувони низомӣ дар самту соҳаҳои гуногуни Артиши миллӣ сухан гуфта, иброз дошт, ки Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон дар баромадҳояшон пайваста ба фаъолияти занону бонувон баҳои баланд дода, таъкид менамоянд, ки мо ба азму ирода ва масъулиятшиносии зан-модар ҳамчун нерӯйи бузурги ҷомеа эътимоди комил дорем.
Дар ҷамъомад инчунин қайд карда шуд, ки модар барои ҳар як инсон азизтарин кас буда, албатта бесабаб нест, ки муқаддастарин мафҳум, яъне Ватанро бо мафҳуми модар баробар ва ҳамрадиф донистаанд. Ин ду мафҳум барои ҳар як инсони соҳибқалбу соҳибватан арзишу манзалати якхела доранд. Тамоми бузургону донишмандон, ки бани инсоният бо он ифтихор дорад, зодаву парвардаи модарон мебошанд.
Дар охири ҷамъомад аз ҷониби кумитаи иҷроияи ҲХДТ дар шаҳри Душанбе ва ноҳияи Исмоили Сомонии пойтахт бахшида ба Рӯзи Модар, ба занон-хизматчиёни ҳарбии Вазорати мудофиа Ифтихорнома ва тӯҳфаҳои гуногуни хотирмон тақдим намуданд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
