27-уми июни соли равон аз баимзорасии Созишномаи истиқрори сулҳ ва ризоияти миллӣ дар Ҷумҳурии Тоҷикистон 25 сол пур гардид. Воқеан имзои ин ҳуҷҷати тақдирсоз дар ҳаёти минбаъдаи давлату миллат дигаргуниҳои куллиро ба вуҷуд овард. Дар муддати начандон тӯлонӣ миллати мо ба дастоварду комёбиҳои назаррас ноил гардид. Маҳз, самараи ваҳдату якдилӣ аст,ки имрӯз ҳар фарди тоҷикистонӣ метавонад, озодона кору фаъолият намояду зиндагии созгореро баҳри худ муҳайё созад.
Дар доираи баргузории чорабиниҳои ҷашнӣ ба ифтихори ин санаи таърихӣ, дар Донишкадаи ҳарбии Вазорати мудофиаи Ҷумҳурии Тоҷикистон низ дар мавзӯи «Нақши Ваҳдати миллӣ дар таъмини амнияти кишвар ва ҳаёти осоиштаи ҷомеа», конференсияи ҷумҳуриявии илмию амалӣ баргузор гардид. Конференсия бо садо додани Суруди миллӣ ифтитоҳ ёфт ва роҳбарияти
Донишкадаи ҳарбӣ ҳайати меҳмононро ба ин боргоҳи илму маърифати низомӣ хайрамақдам гуфта, ба кори конференсия оғоз бахшиданд.
Дар ҷараёни конференсия намояндагон аз Академияи миллии илмҳо, Кумитаи иҷроияи Ҳаракати ваҳдати миллӣ ва эҳёи Тоҷикистон, Кумитаи кор бо ҷавонон ва варзиш, Кумитаи забон ва истилоҳот, Маркази тадқиқоти стратегии Назди Президенти Ҷумҳурии Тоҷикистон, Донишкадаи олии сарҳадии Кумитаи давлатии амнияти миллӣ ва Раёсат оид ба корҳои сиёсӣ-тарбиявии Вазорати мудофиаи Ҷумҳурии Тоҷикистон дар мавзуъҳои “Нақши Эмомалӣ Раҳмон дар таҳкими Ваҳдати миллӣ”, “Заминаи ҳуқуқии Ваҳдати миллӣ”, “Нақши забон дар кишвари ваҳдатсаро”, “Таърихи Ваҳдати миллӣ дар Ҷумҳурии Тоҷикистон” ва дигар мавзўъҳо маърўзаҳои пурмазмунро пешкаши ҳозирин намуданд.
Иштирокчиён зимни баромади худ изҳор доштанд, ки Ваҳдати миллӣ дар пешравию ободии мамлакат нерӯю суръати баланд бахшида, боиси ифтихору сарфарозии ҳар як фарди соҳибватан гардидааст. Зеро, то вақте дар Ватани азизамон Сулҳу ваҳдат ҳукмфармо аст, ҳеҷ кас наметавонд амнияту суботи давлат ва ҳаёти ободу осиштаи мардуми ин сарзаминро халалдор созад.
Ҳамзамон баромадкунандагон қайд карданд, ки маҳз натиҷаи талошҳои пайгирона ва заҳматҳои хастанопазири Пешвои миллат муҳтарам Эмомалӣ Раҳмон буд, ки мо дар роҳи расидан ба ваҳдату ҳамдилӣ ва сулҳу суботи пойдор дар Тоҷикистони азиз ба дастовардҳои бузурги таърихӣ ноил гардидем. Ин аст, ки имрўз таҷрибаи сулҳи тоҷикон ва ақлу заковати ваҳдатофарии Сарвари давлат аҳамияти ҷаҳонӣ касб намудааст. Дар воқеъ, чунин қаҳрамониву ғамхориҳо нисбат ба халқу ватан сутуданист. Пас моро месазад, ки ҳамеша дар паҳлуи Пешвои миллат бошем ва баҳри пешрафту шукуфоии Тоҷикистони соҳибистиқлол камари ҳиммат бубандем.
Дар фарҷоми конференсия як қатор устодону донишҷўён ва ҳайати иштирокчиён аз ҷониби раёсати Донишкадаи ҳарбӣ бо сипосномаҳо қадрдонӣ гардиданд ва чорабинӣ бо садо додани Суруди миллӣ анҷом ёфт.
Шоҳин ШАРИФОВ
