Рӯзи 22-юми майи соли 2024 нақшаи даъвати баҳории шаҳрвандон ба сафи Қувваҳои Мусаллаҳи Ҷумҳурии Тоҷикистон дар вилоятҳо ва тамоми шаҳру ноҳияҳои мамлакат пеш аз муҳлат ба анҷом расид.
Бо ҳамин тартиб аз 1-уми апрел то 22-юми майи соли 2024 нахуст вилояти мухтори кӯҳистони Бадахшон, баъдан чаҳор навоҳии шаҳри Душанбе, вилояти Хатлон, шаҳру ноҳияҳои тобеи ҷумҳурӣ ва вилояти Суғд оид ба иҷрои 100 фоизаи нақшаи даъвати ҷавонписарон ба сафи Артиши миллии Тоҷикистон гузориш доданд.
Ин нуқта қобили таваҷҷуҳ аст, ки агарчӣ нақшаи даъвати шаҳрвандон ба хизмати ҳатмии ҳарбӣ пеш аз муҳлат 100 фоиз иҷро гардида бошад ҳам, лек бо мақсади баррасӣ намудани муроҷиати шаҳрвандон фаъолияти мақомоти масъули вобастаи ин чорабинии муҳими сиёсӣ ё худ комиссияҳои даъватӣ то охири моҳи майи соли равон идома меёбад.
Дар ин радиф, тибқи оморҳои мавҷуда, вобаста ба зиёд будани шумораи шаҳрвандони ихтиёрӣ, ба хусус муроҷиати ҷавонписарони дорои маълумоти олӣ, ки хоҳиши шомил шудан ба сафи Қувваҳои Мусаллаҳро доранд, даъвати имсолаи баҳории шаҳрвандон ба хизмати ҳарбӣ хуб арзёбӣ карда мешавад.
Зеро, дар он шаҳру ноҳияҳое, ки масъулини мақомоти иҷроияи ҳокимияти давлатӣ ба ин маъракаи муҳими сиёсӣ таваҷҷӯҳи махсус зоҳир намуда, бо мардум ҳамкории зичро ташкилу ба роҳ мондаанд, дар чунин минтақаҳо дар самти чорабиниҳои даъватӣ ва гусели шаҳрвандон ба хизмати ҳатмии ҳарбӣ монеаву мушкилот ба назар намерасад.
Дар робита ба ин, тавре қаблан хабар дода будем, рӯзи якуми апрели соли равон, алакай тамоми шаҳру навоҳии вилояти мухтори кӯҳистони Бадахшон, ноҳияҳои Рашт, Сангвор, Лахш, Нуробод, Тоҷикободи шаҳру ноҳияҳои тобеи ҷумҳурӣ ва дар вилояти Хатлон бошад ноҳияҳои Вахш, Фархор, Хуросон, Муъминобод ва ноҳияи Носири Хусрав дар рӯзи нахустини ин маъракаи муҳими сиёсӣ иҷрои нақшаи пешбинишударо оид ба даъвату гусели ҷавонписарон ба сафи Артиши миллӣ пурра ба анҷом расониданд.
Барои маълумот хотиррасон мекунем, ки даъвати баҳории шаҳрвандон ба сафи ҷузъу томи Артиши миллии мамлакат тибқи талаботи Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ” ва дар асоси Фармони Президенти Ҷумҳурии Тоҷикистон, муҳтарам Эмомалӣ Раҳмон аз 5-уми марти соли 2024, таҳти №791 “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1997-2006-и Ҷумҳурии Тоҷикистон ба хизмати ҳарбӣ” дар тамоми шаҳру навоҳии мамлакат давоми моҳҳои апрел ва майи соли равон ҷараён гирифт.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
