23-юми майи соли равон, пеш аз муҳлати муайянгардида, ҳама комиссияҳои даъватии шаҳру ноҳияҳои мамлакат оид ба анҷоми нақшаи даъвати ҷавонон ба хизмати ҳарбӣ гузориш доданд ва ҳамин тавр нақшаи даъвати баҳорӣ ба сафи Артиши миллӣ пурра иҷро шуд.
Тавре қаблан иттилоъ дода будем, аз якуми апрели соли равон бо оғоз гардидани даъвати баҳории шаҳрвандон ба хизмати ҳарбӣ, аввалин шуда дар ҷумҳурӣ, шаҳру ноҳияҳои Вилояти Мухтори Кӯҳистони Бадахшон нақшаи пешбинигардидаро дар рӯзи аввал иҷро намуданд.
Ҳамин тавр дар баробари дигар шаҳру ноҳияҳои ҷумҳурӣ, шаҳри Душанбе ва шаҳру ноҳияҳои вилояти Хатлон низ яке аз аввалинҳо шуда, нақшаи пешбинишударо пурра ба анҷом расониданд.
Ҳамзамон, масъулини вобастагардидаи даъват дар шаҳру ноҳияҳои тобеи ҷумҳурӣ ва вилояти Суғд низ саривақт ин маъракаи муҳими сиёсиро ба анҷом расониданд.
Мусаллам аст, ки дар он шаҳру ноҳияҳое, ки масъулини мақомоти иҷроияи ҳокимияти давлатӣ ба ин маъракаи муҳими сиёсӣ таваҷҷуҳи хосса зоҳир намуданд, сатҳу сифати чорабиниҳои даъватӣ ва гусели шаҳрвандон ба хизмати ҳатмии ҳарбӣ хуб ба назар мерасад.
Бояд қайд кард, ки дар даврони соҳибистиқлолии кишвар аз ҷониби давлату Ҳукумат нисбат ба Қувваҳои Мусаллаҳ, дастгириву ғамхориҳои пайваста зоҳир мегардад. Ин омил ҳар як шаҳрванди худогоҳу ватандӯсти диёрро водор ба он месозад, то бо дарки баланди масъулияти ҷавонмардӣ дар муҳити орому осоишта ва фазои сулҳу суботи Тоҷикистони азиз, хизмати пуршарафи Модар-Ватанро адо намояд.
Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон
