Даъват ба хизмати ҳарбӣ масъулияти шаҳрвандии ҳар як фарди худогоҳу хештаншиноси ҷомеа ба ҳисоб рафта, бо шомил гардидан ба сафи ҷузъу томи Қувваҳои Мусаллаҳ ва дигар сотрҳои низомии кишвар ҷавонписарон вазифаи муҳиму муқаддаси фарзандии хешро дар назди Модар — Ватан иҷро менамоянд.
Бо ин мақсад, аз 1 октябри соли 2025 дар тамоми қаламрави ҷумҳурӣ даъвати тирамоҳии шаҳрвандон ба сафи Қувваҳои Мусаллаҳи Ҷумҳурии Тоҷикистон бо ташкили чорабиниҳои «Рӯзи даъватшаванда» дар фазои тантанавӣ оғоз гардид, ки садњо нафар ҷавонписарони синну соли даъватӣ ба комиссариатҳои ҳарбии маҳалли зисти хеш ҳозир шуда, ҳамчун аввалин даъватшавандагон омодагии худро баҳри хизмат ба халқу Ватан нишон доданд.
Чун анъана дар нахустрӯзи даъват Вилояти мухтори кӯҳистони Бадахшон нақшаи пешбинигардидаро 101 фоиз иҷро намуда, дар баробари шаҳру ноҳияҳои ин вилоят, инчунин шари Норак, ноҳияҳои Вахш ва Балҷувони вилояти Хатлон ва Сангвор низ аввалин шуда аз иҷрои нақшаи даъват гузориш додаанд.
Ҳамин тавр, дар рӯзи аввали даъват иҷрои нақша дар ҷумҳурӣ 55 фоизро ташкил медиҳад.
Қобили зикр аст, ки даъвату гусели шаҳрвандон ба сафи Қувваҳои Мусаллаҳи мамлакат, дар асоси Фармони Президенти Ҷумҳурии Тоҷикистон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007-и Ҷумҳурии Тоҷикистон ба хизмати ҳарбӣ” ташкилу ба роҳ монда шудааст.
Дар робита ба ин, айни ҳол дар комиссариатҳои ҳарбии вилоятҳо ва шаҳру ноҳияҳои мамлакат аз ҳисоби масъулини бахшу шуъбаҳои вобастаи мақомоти иҷроияи ҳокимияти давлатӣ, комиссияҳои давлатии даъват таъсис дода шудаанд, ки аъзоёни вобасташудаи ин маъракаи муҳими сиёсӣ давоми моҳҳои октябр ва ноябри соли равон даъвату гусели шаҳрвандонро ба хизмати ҳатмии ҳарбӣ дар сатҳи лозима ташкилу баргузор менамоянд.
Бояд қайд намуд, ки ҳамасола дар Ҷумҳурии Тоҷикистон шаҳрвандони ҷинси марди аз 18 то 27-сола дар ду мавсим, аз ҷумла дар давоми моҳҳои апрел-май ва октябр-ноябр ба хизмати ҳатмии ҳарбӣ даъват карда мешаванд.
Дар баробари даъвату гусели шаҳрвандон ба сафи Қувваҳои Мусаллаҳ ҳамзамон сарбозоне, ки муҳлати муқаррагардидаи хизмати ҳарбиро дар қисму воҳидҳои низомии Артиши миллӣ, ҷузъу томи сохторҳои қудратии мамлакат ва мақомоти ҳифзи ҳуқуқи кишвар ба итмом расонидаанд, дар давоми моҳҳои октябр-ноябри соли равон марҳила ба марҳила аз сафи қисмҳои ҳарбӣ ба эҳтиёт рухсат карда мешаванд.
Илҳом АЛИЗОДА,
сардори Маркази матбуот ва иттилооти
Вазорати мудофиаи Ҷумҳурии Тоҷикистон,
капитан
