Вобаста ба иҷрои дастуру супоришҳои Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон ва татбиқи нақшаи чорабиниҳои Вазорати мудофиаи Ҷумҳурии Тоҷикистон, дар вазорат маҷлиси ҳайати мушовара доир гардида, дар он натиҷаҳои фаъолияти нимсолаи аввали соли 2026 ҷамъбаст ва вазифаҳо барои нимсолаи дуюми соли ҷорӣ муайян карда шуданд.
Дар ҷаласа котиби Шӯрои амнияти Ҷумҳурии Тоҷикистон, генерал-полковники адлия Раҳмон Юсуф Аҳмадзода, роҳбарияти Вазорати мудофиа, сарпрокурори ҳарбии ҷумҳурӣ, намояндагони сохторҳои дахлдор, сардорони раёсатҳо, шуъбаҳо ва хадамотҳои алоҳидаи дастгоҳи марказии вазорат, Ситоди генералии Қувваҳои Мусаллаҳ, ҳайати роҳбариву фармондеҳии навъҳои қӯшун, командирони қисмҳои ҳарбӣ ва дигар ҷузъу томҳои алоҳидаи низомӣ иштирок намуданд.
Зимни ҷаласа масъалаҳои таҳкиму тақвияти иқтидори мудофиавии кишвар, ҳифзи амнияту суботи давлат ва татбиқи сиёсати мудофиавии ҷумҳурӣ, ки таҳти таваҷҷуҳи доимии Президенти Ҷумҳурии Тоҷикистон муҳтарам Эмомалӣ Раҳмон қарор доранд, мавриди баррасӣ қарор гирифтанд. Сардори Ситоди генералии Қувваҳои Мусаллаҳ ва муовинони вазири мудофиа вобаста ба самтҳои фаъолияти худ маърӯза карданд.
Иштирокчиён ба ҳолати омодабошии ҷангии Қувваҳои Мусаллаҳ, такмили дониш ва омодагии ҳайати шахсӣ, баргузории машқҳои муштараки ҳарбӣ, санҷиши омодабошии захираҳои сафарбарӣ, қувва ва воситаҳои мудофиаи ҳудудӣ, ташкили босифати маъракаи даъвати ҷавонон ба хизмати ҳарбӣ, тайёр намудани мутахассисони хурди низомӣ ва дигар масъалаҳои муҳими соҳа таваҷҷуҳи махсус зоҳир намуданд.
Ҳамчунин, вазъи қонуният, тартиботи ҳуқуқӣ, интизоми ҳарбӣ, ташкили корҳои тарбиявӣ, баланд бардоштани маърифати ҳуқуқии хизматчиёни ҳарбӣ, нигоҳдорӣ ва истифодаи техникаҳои ҳарбӣ, таъминоти ақибгоҳӣ, истифодаи самараноки заминҳои хоҷагиҳои ёрирасони назди қисмҳои ҳарбӣ ва омодагӣ ба давраи тирамоҳу зимистони солҳои 2026–2027 баррасӣ гардид.
Вазири мудофиаи Ҷумҳурии Тоҷикистон, генерал-полковник Собирзода Эмомалӣ, бо ишора ба вазъи мураккабу зудтағйирёбандаи ҷаҳони муосир, зарурати иҷрои босифати дастуру супоришҳои Сарфармондеҳи Олӣ ва омодагии доимии хизматчиёни ҳарбиро барои ҳифзи манфиатҳои миллӣ таъкид намуд. Иштирокчиёни ҷаласа ҳамчунин ҷиҳати омодагии шоиста ба таҷлили 35-солагии Истиқлоли давлатии Ҷумҳурии Тоҷикистон бо супоришҳои мушаххас вазифадор гардиданд.
Котиби Шӯрои амнияти ҷумҳурӣ дар суханронии худ аз дастгириву ғамхории доимии Пешвои миллат нисбат ба хизматчиёни ҳарбӣ ёдовар шуда, ба масъалаҳои беҳдошти шароити хизмат, авзои ҳарбӣ-сиёсии минтақа ва ҷаҳон ва зарурати омодагии ҳамаҷониба барои ҳифзи суботу оромии кишвар таваҷҷуҳи махсус зоҳир намуд.
Дар анҷоми маҷлис як қатор афсарони қисму воҳидҳои ҳарбии Вазорати мудофиа ва сохторҳои зертобеи он барои хизмати софдилона, дастовардҳои назаррас ва ғолибият дар мусобиқаҳои умумиҳарбӣ бо ифтихорнома ва мукофотҳои пулӣ сарфароз гардонида шуданд.
Илҳом АЛИЗОДА,
сардори Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон,
капитан
