Рӯзи 12-уми апрели соли 2025 бо иштироки ҳайатҳои роҳбарии Вазорати мудофиаи мамлакат, фармондеҳони навъҳои Қувваҳои Мусаллаҳ, комиссарони ҳарбии вилоятҳо ва командирони қисму воҳидҳои алоҳидаи низомӣ ҷаласа баргузор гардид, ки дар он вазъи кунунии ҷузъу томи Артиши миллӣ, тақвият бахшидани сатҳи тайёрии ҷангӣ, боз ҳам баланд бардоштани иқтидори мудофиавии кишвар ва дигар масъалаҳои марбут ба самтҳои фаъолияти соҳавии ин ниҳоди қудратӣ, мавриди таҳлилу баррасии ҳамаҷониба қарор гирифт.
Дар ҷаласа нахуст бурду бохт ва фаъолияти ҳамаҷонибаи Вазорати мудофиаи мамлакат, мавриди таҳлилу баррасӣ ва натиҷагирӣ қарор дода шуд. Сардори Ситоди генералии Қувваҳои Мусаллаҳ, муовинони вазири мудофиа ва роҳбарони чанде аз раёсатҳои дахлдори ин ниҳоди қудратӣ доир ба тақвият бахшидани сатҳи тайёрии ҷангии Артиши миллӣ, чорабиниҳои сафарбарӣ, ҳолати таъмини бехатарии хизмати ҳарбӣ, фаъолияти хадамоти қӯшунҳо, вазъи қонунияту тартиботи ҳуқуқӣ, интизоми ҳарбӣ, ҳолати иҷрои саривақтии талаботи ҳуҷҷатҳои роҳбарикунанда, ҷараёни даъвати баҳории шаҳрвандон ба хизмати ҳарбӣ, пуррагардонии вазифаҳои холии афсариву прапоршикӣ, рушди хоҷагиҳои ёрирасон ва оид ба дигар масъалаҳои марбут ба самтҳои фаъолияти ин ниҳоди қудратӣ маърӯза карданд.
Баъд аз муҳокимаи масъалаҳои ба миён гузошташуда вазири мудофиаи мамлакат зимни вазифагузорӣ қайд намуд, ки Сарфармондеҳи Олии Қувваҳои Мусалаҳ, генерали артиш муҳтарам Эмомалӣ Раҳмон дар ҳалли ҳама масъалаҳои амниятӣ ва баҳри баланд бардоштани иқтидори мудофиавии кишвар диққати аввалиндараҷа зоҳир намуда, фаъолият ва бурду бохти сохторҳои низомии мамлакатро таҳти назорати доимӣ қарор додаанд. Аз ин рӯ, таъкид карда шуд, ки хизматчиёни ҳарбии ҳама зинаҳо ва мартабаҳо, пеш аз ҳама баҳри иҷрои талаботи дастуру супоришҳо ва вазифаҳое, ки Пешвои миллат муҳтарам Эмомалӣ Раҳмон зимни ироаи Паёми навбатӣ ва дар ҷашни Артиши миллӣ дар назди мо гузоштаанд, диққати аввалиндараҷа зоҳир намоянд.
Дар охири ҷаласа роҳбарияти Вазорати мудофиа, ҳамчунин баҳри ислоҳ ва бартараф намудани камбудиҳои ҷойдошта, ташкили хизмати дохилии қӯшунҳо, дар муҳлати муайян ва бо сифати баланд ба анҷом расонидани даъвати баҳории шаҳрвандон ба хизмати ҳарбӣ, қабулу ҷобаҷокунии наваскарон дар қисмҳои низомӣ, таҳким бахшидани сатҳи омодабошии ҷангӣ, боз ҳам пурзӯр намудани корҳои сиёсӣ-тарбиявӣ ва чорабиниҳои тарғиботиву ташвиқотӣ, ташкили машғулиятҳои омодагии сафарбарӣ, самаранок истифода бурдани ҳар қитъа замини хоҷагиҳои ёрирасон ва вобаста ба дигар самтҳои фаъолияти соҳавӣ масъулини дахлдори ин ниҳоди қудратиро бо супоришҳои мушаххас вазифадор намуданд.
Фаридун МАҲМАДАЛИЗОДА,
сардори Маркази матбуот ва иттилооти
Вазорати мудофиаи Ҷумҳурии Тоҷикистон,
полковник
