Дар ҷаласае, ки оид ба натиҷаҳои фаъолият ва бурду бохти Вазорати мудофиаи Ҷумҳурии Тоҷикистон дар давоми 6 моҳи аввали соли 2023-юм баргузор гардид, Котиби Шӯрои амнияти ҷумҳурӣ, ҳайатҳои роҳбариву фармондеҳии Вазорати мудофиа, Ситоди генералии Қувваҳои Мусаллаҳ, намояндагон аз Кумитаи давлатии амнияти миллӣ, Агентии таъминоти амволи махсус, Сарпрокуратураи ҳарбӣ, масъулини Ташкилоти ҷамъиятии мададгори мудофиа ва дигар шахсони расмӣ дар он иштирок ва суханронӣ намуданд.
Иштирокчиёни ҷаласа як қатор масъалаҳои муҳими ҳарбӣ, аз ҷумла таҳлили барномаҳои таълимии самти омодабошии ҷангӣ, тайёрии амалиётӣ, машғулиятҳои омодагии сафарбарӣ, натиҷаи даъвати баҳории шаҳрвандон ба хизмати ҳарбӣ, бурду бохти сохторҳои таркибии навъи қӯшунҳо, беҳдошти вазъи иҷтимоии афсарону сарбозони ҷузъу том, ҳолати нигаҳдорӣ ва самаранок истифода бурдани техникаҳои зиреҳпӯши ҷангиву автомобилӣ, вазъи қонунияту тартиботи ҳуқуқӣ, пешгирии сатҳи содиршавии ҷинояту қонуншиканӣ, марҳилаҳои рушду азнавсозии Қувваҳои Мусаллаҳ, таъминоти ҳамаҷонибаи соҳаи ақибгоҳӣ, ҷамъовариву захира намудани маҳсулоти кишоварзӣ, омодагии масъулин ба фасли сармо ва дигар самтҳои фаъолияти ин ниҳоди қудратиро мавриди таҳлилу омӯзиши ҳамаҷониба қарор доданд.
Аз рӯйи масъалаҳои дар боло зикрёфта, сардори Ситоди генералии Қувваҳои Мусаллаҳ, муовинони вазири мудофиа ва дигар масъулини дахлдори ин ниҳоди қудратӣ, дар назди ҳозирин маърӯза карданд.
Баъд аз муҳокимаи масъалаҳои ба миён гузошташуда, роҳбарияти Вазорати мудофиа дар навбати худ иброз дошт, ки Сарфармондеҳи Олии Қувваҳои Мусаллаҳ, генерали артиш мӯҳтарам Эмомалӣ Раҳмон, баҳри баланд бардоштани иқтидори мудофиавии кишвар ва дар ҳалли ҳама масоили амниятӣ диққати аввалиндараҷа зоҳир намуда, фаъолият ва бурду бохти сохторҳои низомии мамлакатро таҳти назорати доимӣ қарор додаанд.
Аз ин рӯ таъкид карда шуд, ки ҳар як хизматчии ҳарбӣ, бо иродаи қавӣ дар самти ӯҳдадориҳои соҳавӣ бояд содиқона рафтор кунад, зиракиву ҳушёриро аз даст надиҳад, барои амалӣ намудани нақша-чорабиниҳои пешбинишудаи амниятӣ ва иҷрои талаботи дигар вазифаҳои хизматӣ, бо масъулияти баланд муносибат намоянд.
Дар баробари баррасии маҷмӯи масъалаҳои муҳими низомӣ, ҳамзамон таъкид карда шуд, ки барои дар сатҳи зарурӣ таҷлил намудани чорабиниҳои сатҳи ҷумҳуриявӣ, аз ҷумла 32-юмин солгарди Истиқлоли давлатӣ, тақвият бахшидани фаъолияти хизматӣ ва касбиву соҳавӣ, ташкили машғулиятҳои сафарбарӣ, пурзӯр намудани интизоми ҳарбӣ, саривақт мусоидат намудан ба ҳалли ҳама мушкилоти афсарону сарбозон дар қисмҳои низомӣ, таҳти назорати доимӣ қарор додани дарсу машғулиятҳои рӯзмарраи таълимӣ, самаранок истифода намудани маблағҳои буҷетӣ, чораҳои пешгирӣ аз сӯхтор, таъминоти ҳамаҷонибаи соҳаи ақибгоҳӣ, рушди хоҷагиҳои ёрирасон, саҳмгузорӣ дар корҳои ободонӣ ва баҳри ташкилу баргузор намудани дигар маъракаҳои муҳими сиёсӣ таваҷҷӯҳи хоса зоҳир карда шавад.
Дар охири ҷаласа оид ба дастуру супоришҳои Сарфармондеҳи Олии Қувваҳои Мусаллаҳ, Пешвои миллат, мӯҳтарам Эмомалӣ Раҳмон, Котиби Шӯрои амнияти ҷумҳурӣ низ бо ироаи пешниҳодҳои мушаххас, фаъолият ва бурду бохти Артиши миллиро ҳамаҷониба натиҷагирӣ намуда, оид ба таҳдиди хатарҳои ҷаҳони муосир, боз ҳам тақвият бахшидани сатҳи омодабошии ҷангӣ, муҷаҳҳаз намудани сохторҳои қудратии мамлакат бо техникаву таҷҳизоти муосири ҳарбӣ ва дар доираи ислоҳоту азнавсозӣ амалишавии нақша-чорабиниҳои пешбинишударо, баҳри рушду нумӯи минбаъдаи Қувваҳои Мусаллаҳи ҷумҳурӣ муҳиму саривақтӣ арзёбӣ намуд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи Ҷумҳурии Тоҷикистон,
полковник
