Бо масоили баланд бардоштани сатҳи тайёрии ҷангӣ, беҳдошти сифати даъвати шаҳрвандон ба хизмати ҳарбӣ, қабулу ҷобаҷокунии наваскарон дар қисмҳои низомӣ, тарбияи сарбозони ҷавон дар рӯҳияи ҳарбӣ-ватандӯстӣ ва вобаста ба дигар масъалаҳое, ки дар самти боз ҳам тақвият бахшидани иқтидори мудофиавии кишвар таъсири бевосита мерасонад, аз ҷониби ҳайати роҳбариву фармондеҳии Қувваҳои Мусаллаҳи мамлакат, корҳои зиёде амалӣ карда мешаванд.
Ҷаласае, ки дар Вазорати мудофиаи мамлакат баргузор гардид, дар он як қатор масъалаҳои муҳими соҳавӣ, аз ҷумла, таҳлили барномаҳои таълмии самти омодабошии ҷангӣ, тайёрии амалиётӣ, ҷараёни чорабиниҳои даъватии шаҳрвандон ба хизмати ҳатмии ҳарбӣ, қабулу ҷобаҷокунии наваскарон дар қисмҳои низомӣ, вазъи қонунияту тартиботи ҳуқуқӣ, таъминоти ҳамаҷонибаи соҳаи ақибгоҳӣ ва воситаҳои моддӣ-техникӣ, ҷамъовариву захира намудани маҳсулоти кишоварзӣ, омодагии масъулин ба фасли сармо, ҳолати нигаҳдорӣ ва истифодаи самараноки техникаҳои зиреҳпӯши ҷангиву автомобилӣ ва дигар самтҳои фаъолияти ин ниҳоди қудратӣ мавриди таҳлилу омӯзиши ҳамаҷониба қарор гирифт. Аз рӯйи масъалаҳои дар боло зикрёфта, сардори Ситоди генералии Қувваҳои Мусаллаҳ, муовинони вазири мудофиа ва дигар
масъулини дахлдор дар навбати худ баромад намуданд.
Дар ҷаласа, инчунин вазъи кунунии Қувваҳои Мусаллаҳ ҳамаҷониба баррасӣ гардида, вобаста ба як қатор норасоӣ ва камбудиҳои ошкоргардида, дар фаъолияти баъзе аз раёсати навъи қӯшунҳо ва қисмҳои низомӣ, изҳори нигаронӣ карда шуд ва баҳри бартараф намудани мушкилоти ҷойдошта ва ҳалли дигар монеаҳои мавҷуда масъулини дахлдор бо супоришҳои мушаххас вазифадор гардиданд.
Дар баробари баррасии масъалаҳои гуногуни соҳавӣ, инчунин вобаста ба дастуру супоришҳои Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ, генерали артиш, муҳтарам
Эмомалӣ Раҳмон, вазири мудофиаи мамлакат ба сухан баромада, аз дастоварду комёбиҳои 30 соли Истиқлоли давлатӣ ва рушду камоли Артиши миллӣ ёдовар шуд. Дар ин замина, изҳор намуд, ки корҳои созандагиву бунёдкорӣ ва тамоми нақша-чорабиниҳое, ки ба муносибати ин ҷашни таърихӣ қаблан ба тасвиб расидаанд, то охири ҳамин сол пурра ва дар сатҳи баланд, бояд иҷро карда шаванд.
Илова бар ин, аз номи Пешвои миллат муҳтарам Эмомалӣ Раҳмон ба тамоми низомиёни кишвар, ки бо масъулияти баланди касбиву соҳавӣ дар таъмини амният ва чорабиниҳои баргузоршудаи сатҳи ҷумҳуриявӣ, иштироки фаъолона доштанд, изҳори сипосу миннатдорӣ карда шуд.
Дар охири ҷаласа, вобаста ба таҳлилу барраси вазъияти ниҳоят ҳассос ва пешгӯинашавандаи баъзе аз давлатҳои минтақа ва ҷаҳон, ки аз ҳарвақта дида бисёр нигароникунанда мебошад, қатъӣ супориш дода шуд, ки ба масоили пурзӯр намудани интизоми ҳарбӣ, ҳифз ва ҳимояи шаҳрчаҳои низомӣ, зери назорати қатъӣ қарор додани сатҳу сифати даъвати шаҳрвандон ба хизмати ҳарбӣ, ғамхории ҳамаҷониба зоҳир намудан ба вазъи иҷтимоии хизматчиёни ҳарбӣ, ҷоннок намудани тамоми самтҳои фаъолияти соҳавӣ, самаранок истифода намудани маблағҳои буҷетӣ, рушди хоҷагиҳои ёрирасон, саҳмгузорӣ дар корҳои ободонӣ, аз даст надодани ҳушёриву зиракии сиёсӣ, бо масъулияти баланди касбиву вазифавӣ ва эҳсоси ватандӯстӣ баҳри тақвият бахшидани сатҳи омодабошии доимии ҷангӣ, бояд диққати аввалидараҷа равона карда шавад.
Фаридун МАҲМАДАЛИЗОДА,
сардори Маркази матбуот,
