Бо иштироки вазири мудофиаи Ҷумҳурии Тоҷикистон генерал–полковник Эмомалӣ Собирзода, муовинони вазири мудофиа, сардорони раёсатҳо ва дигар кормандони ин ниҳоди қудратӣ фаъолияти Вазорати мудофиаи Ҷумҳурии Тоҷикистондар нуҳ моҳи соли 2025 натиҷагирӣ карда шуд.
Зимни ҷаласаи ҳайати мушовара, нахуст муовини аввали вазири мудофиа, сардори Ситоди генералии Қувваҳои Мусаллаҳи кишвар генерал–лейтенант Бобоҷон Саидзода оид ба ҳолати омодабошии ҷангии Қувваҳои Мусаллаҳи Ҷумҳурии Тоҷикистон дар шароити бениҳоят ноустувори авзои сиёсии ҷаҳон, гузаронидани тамринҳои ҳатмии ҳарбӣ, дар ҳолати доимии омодабош қарор доштани хизматчиёни низомӣ, техникаҳои ҳарбӣ ва дигар аслиҳаи ҷангӣ изҳори андеша намуд.
Таъкид рафт, ки Президенти Ҷумҳурии Тоҷикистон, Пешвои миллат, Сарфармондеҳи Олии Қувваҳои Мусаллаҳ, генерали Артиш муҳтарам Эмомалӣ Раҳмон ҳамеша зимни баромадҳояшон таъкид менамоянд, ки пеш аз ҳама хизматчиёни низомӣ ҳушёру зирак бошем, ватани азизи худро дӯст дорем ва барои таъмини амнияту суботи ин сарзамини биҳиштосо ҳама донишу таҷрибаи худро равона созем.
Омода намудани мутахассисони баландихтисоси соҳаи низомӣ ва баланд бардоштани савияи донишу таҷрибаи хизматчиёни ҳарбӣ, тақвияти сатҳи забондонии онҳо, ташкили машғулиятҳои касбӣ–вазифавӣ, тайёр намудани захираҳои сафарбарӣ ва омӯзиши сатҳи донишу тарбияи онҳо аз масъалаҳои дигари матраҳгардида ба шумор меравад.
Дар идомаи ҷаласа доир ба самти тайёрии ҷангӣ, ки дар ҳама давру замон ҷузъи муҳими Қувваҳои Мусаллаҳи кишвар ба шумор меравад, ҳисобот дода шуд.
Иброз гардид, ки бо дастгирии Ҳукумати Ҷумҳурии Тоҷикистон имрӯзҳо дар ҳама қисму воҳидҳои низомии Вазорати мудофиа шароити хуби кору фаъолият фароҳам оварда шудаваст.
Бо истифода аз чунин имкониятҳо, хизматчиёни низомӣ ҳамеша бо иштироки ҳайати роҳбариву фармондеҳии вазорат, ҷамъомадҳои методӣ–таълимӣ ва дигар машғулиятҳои соҳавӣ дар сатҳи баланд ташкил ва гузаронида мешавад.
Ин гуна чорабиниҳо барои баланд бардоштани малакаи касбии ҳайати шахсӣ мусоидат менамояд.
Риояи ҳатмии қонуният, тартиботи ҳуқуқӣ ва интизоми ҳарбӣ, ки асоси омодагии ҷангии қувваҳои мусаллаҳро ташкил медиҳад, аз масъалаҳои дигар ва муҳими ҷамъомади мазкур ба ҳисоб меравад.
Дар ин қисмат иттилоъ дода шуд, ки сатҳи содиршавии ҷиноят коҳиш ёфта, маърифати ҳуқуқӣ ва масъулиятшиносии афсарону сарбозон ҳангоми иҷрои вазифаҳои хизматияшон баланд мегардад.
Бо назардошти ин, масъулини қисму воҳидҳои ҳарбӣ кӯшиш менамоянд, ки ҷавононро дар рӯҳияи ватандӯстиву хештаншиносӣ, ифтихори миллӣ ва ҳифзи дастовардҳои замони соҳибистиқлолӣ ва арзишҳои миллӣ тарбия намоянд.
Ҳамзамон, доир ба иҷрои Қарори Ҳукумати Ҷумҳурии Тоҷикистон “Дар бораи саривақт омода намудани соҳаҳои иқтисодиёёту иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2025-2026” ҳисобот дода шуд.
Зикр гардид, ки бо истифода аз имкониятҳои мавҷуда пайвастшавии бинову иншооти ҳудуди шаҳри Душанбе ба Маркази барқу гармидиҳӣ идома дошта, бинову иншооти ҳарбӣ дар дигар шаҳру ноҳияҳои кишвар , ки бо шабакаи мустақили гармидиҳӣ пайваст ҳастанд, барои зимистонгузаронӣ омода карда мешаванд.
Ҳамзамон, баҳри таъмини маводи хӯрока тадбирҳои зарурӣ андешида шуда, маҳсулоти кишоварзӣ саривақт ҷамъоварӣ ва дар амборҳои махсус ба қадри кофӣ захира карда мешаванд.
Дар идомаи ҷаласа вазири мудофиаи Ҷумҳурии Тоҷикистон генерал–полковник Эмомалӣ Собирзода таъкид намуд, ки сиёсати давлат ва Ҳукумати кишвар дар самти ислоҳоти низомӣ ба таҳкими қобилияти мудофиавии кишвар бо роҳи мукаммалгардонии ҷузъу томи ҳарбӣ бо техникаву таҷҳизоти муосири низомӣ, аслиҳаи мухталифи ҷангӣ, инчунин боло бурдани сатҳи касбият ва ватандӯстии сарбозон равона гардидааст.
Ҳамин аст, ки имрӯзҳо ҷавонони тоҷик аз истифодаи яроқу аслиҳаи ҳозиразамон , идора намудани техникаҳои низомӣ, ба монанди чархбол ва ҳавопаймоҳои зарбазани ҷангӣ ба хубӣ баромада метавонанд.
Артиши миллӣ имрӯз дар баробари неруи бузурги ҳарбӣ будан, ҳамзамон барои садҳо нафар ҷавонони бонангу номус мактаби тарбия ва худшиносии миллӣ ба шумор меравад.
Маркази матбуот ва иттилооти
Вазорати мудофиаи Ҷумҳурии Тоҷикистон
