Дар Шифохонаи ҳарбии Вазорати мудофиа ҷашни Наврӯз бо омдагии ҳамаҷониба ва ташкили чорабиниҳои хоси ин ҷашни ҷаҳонӣ басо ҳам хубу хотирмон доир гардид. Ҳайати шахсии шифохона ва табобатгирандагони он гирди хони Наврӯзӣ ҷамъ омада бо шукргузорӣ аз фазои тинҷу осудаи Ватан ва пайки шодиву сурур ин ҷашни умумиллиро, ки рамзи зебоиву фараҳмандист таҷлил намуданд.
Бояд тазаккур дод, ки ҷашни ҷаҳонии Наврӯз тӯли 13 сол мешавад ҳамчун муждаи сулҳу дӯстӣ ва ҳамдиливу ягонагии сокинони сайёра дар сатҳи байналмилалӣ таҷлил мегардад, ҳамасола дар ватани Наврӯз, Тоҷикистони азиз ин ҷашни аҷдодӣ бо тозакориҳо ва ободу зебо гардонидани гӯшаву канори кишвари маҳбубамон истқбол ва ҷашн гирифта мешавад.
Барномаи рангини консертӣ, ки аз омадани баҳору Наврӯз дарак медод, ба чорабинии Наврӯзӣ дар ин муассисаи табобатии низомӣ ҳусну таровати дигар зам намуд.
Бо чунин тартиб ҷашни байналмилалии Наврӯзи ориёитаборро хизматчиёни ҳарбиву кормандони ѓайринизомии Вазорати мудофиа ва ҳайати шахсии қисму воҳидҳои ҳарбӣ бо ташкилу баргузории чорабиниҳои гуногуни ҷашнӣ ва доир намудани мусобиқаҳои мухталифи варзишӣ, аз қабили гуштини миллӣ, гурзбардорӣ ва бандкашӣ бо шукӯҳу шаҳомати хос ва ба таври хотирмон таҷлил намуданд.
Ҳамзамон, зимни ҷамъбасту натиҷагирии мусобиқаҳои варзишӣ ба муносибати ҷашни байналмилалии Наврӯз, иштирокчиёни фаъоли он аз қисмҳои ҳарбии Вазорати мудофиа ва навъҳои қӯшуни Қувваҳои Мусаллаҳ бо ҷоми мусобиқа ва медалу ифтихорномаҳо сарфароз гардонида шуданд.
Боқӣ ШАРИФОВ
