Чун анъана, ҳамасола дар остонаи баргузории иду ҷашнҳои милливу соҳавӣ дар баробари баргузории дигар чорабиниҳои идона мусобиқаҳои гуногуни варзишӣ низ гузаронида мешавад.
Соли равон низ бо мақсади таҷлили сазовор аз 32-юмин солгарди таъсисёбии Қувваҳои Мусаллаҳи Ҷумҳурии Тоҷикистон, дар асоси фармоиши вазири мудофиа ва бо ташаббуси Клуби марказии варзиши артиш як қатор мусобиқаҳои варзишӣ ба нақша гирифта шудааст.
Аз ҷумла, аз санаи 21-уми январ то 6-уми феврали соли 2025 мусобиқаҳои варзишӣ аз намудҳои волейбол, футболи хурд ва гурзбардорӣ бо санги 24 киллограма байни афсарон ва прапоршикони Дастгоҳи марказӣ, Ситоди генералӣ, раёсатҳои навъҳои Қувваҳои Мусаллаҳ, кафедраҳои ҳарбии назди муассисаҳои олии касбӣ, комиссариатҳои ҳарбии шаҳри Душанбе, Донишкадаву литсейи ҳарбии Вазорати мудофиа гузаронида шуд.
Ҳамзамон, дар арафаи ҷашн ва дар асоси Нақшаи ягонаи Қуваҳои Мусаллаҳ барои соли 2025 бо мақсади муайян намудани маҳорати тирпарронии хизматчиёни ҳарбии гарнизонҳои Душанбе, Хатлон, Суғд, минтақаи Рашт ва вилояти мухтори кӯҳистони Бадахшон аз 1-ум то 10-уми феврали соли равон мусобиқаи тирпарронӣ аз силоҳи оташфишонии Драгунов ММД, автомати АКМ, QSZ 92 мм ва пулемёти ПК 7,62 мм доир карда шуд.
Бояд қайд кард, ки ҳадаф аз баргузории ин чорабиниҳои варзишӣ агар аз як тараф барои дар сатҳи баланд таҷлил намудани ҷашни Артиши миллӣ пешбинӣ шуда бошад, аз ҷониби дигар он баҳри рушди камолоти шахсият, тарғиби тарзи ҳаёти солим, таҳким бахшидани дӯстию рафоқат байни хизматчиёни ҳарбии сохторҳои қудратии мамлакат ва мақомоти ҳифзи ҳуқуқро дар бар мегирад.
Шоҳин ШАРИФОВ
