Ҳамасола дар арафаи таҷлил аз иду ҷашнҳои давлатӣ дар баробари баргузории дигар чорабиниҳои идона мусобиқаҳои гуногуни варзишӣ низ гузаронида мешавад.
Соли равон низ бо мақсади таҷлил аз 31-умин солгарди таъсисёбии Қувваҳои Мусаллаҳи Ҷумҳурии Тоҷикистон бо ташаббуси Клуби марказии варзиши артиш як қатор мусобиқаҳои варзишӣ ба нақша гирифта шудааст.
Аз ҷумла аз 12 то 14-уми феврали соли 2024 дар толори варзишии Муассисаи давлатии «Мактаби махсуси варзишии захираҳои олимпии №5 оид ба намудҳои бозиҳои варзиш»-и шаҳри Душанбе, байни хизматчиёни ҳарбии мақомоти ҳифзи ҳуқуқ ва сохторҳои қудратии мамлакат мусобиқаи Ҷоми вазири мудофиа аз намуди тенниси рӯйи миз доир мегардад. Илова бар ин, мусобиқаҳои варзишӣ аз намудҳои гӯштини миллӣ, волейбол, футболи хурд ва гурзбардорӣ бо санги 24 киллограма миёни хизматчиёни ҳарбии ҷузъу томи гарнизонҳои Душанбе, Хатлон, Суғд, минтақаи Рашт ва вилояти мухтори кӯҳистони Бадахшон ба нақша гирифта шудааст. Ҳамзамон, дар арафаи ҷашн ва дар асоси Нақшаи ягонаи Қуваҳои Мусаллаҳ барои соли 2024 бо мақсади муайян намудани маҳорати тирпарронии ҳайати шахсии афсарони Дастгоҳи марказӣ, Ситоди генералӣ, раёсатҳои навъҳои Қувваҳои Мусаллаҳ ва донишкадаву литсейи ҳарбии Вазорати мудофиа мусобиқаи тирпарронӣ аз силоҳи оташфишонии таппончаи 9 х 9 мм QSZ 92 гузаронида мешавад.
Бояд қайд кард, ки ҳадаф аз баргузории ин чорабиниҳи варзишӣ агар аз як тараф ба муносибати таҷлили сазовор ба ҷашни Артиши миллӣ бахшида шуда бошад, аз ҷониби дигар он баҳри рушди камолоти шахсият, тарғиби тарзи ҳаёти солим, таҳким бахшидани дӯстию рафоқат байни хизматчиёни ҳарбии сохторҳои қудратии мамлакат ва мақомоти ҳифзи ҳуқуқро дар бар мегирад.
Шоҳин ШАРИФОВ
