Дар баробари дигар чорабиниҳои ба нақшагирифташуда, ҳамчунин ҷиҳати сазовор пешвоз гирифтани 33-юмин солгарди ҷашни Истиқлоли давлатии Ҷумҳурии Тоҷикистон, аз санаи 26-уми август то 7-уми сентябри соли ҷорӣ дар ҳудуди гарнизонҳои Суғду Хатлон, Бадахшон ва минтақаи Рашт мусобиқаҳои варзишӣ аз намудҳои ҷанги тан ба тан ва маҷмӯи ҳарбӣ-варзишӣ ташкилу ба роҳ монда шуд.
Зимни ҷараёни мусобиқа дастаҳои варзишӣ мувофиқи ҷадвали муайяншуда миёни ҳам ба рақобат шурӯъ намуда, ҳар як гурӯҳи дар ин мусобиқа иштирокдошта кӯшиш мекард, ки ҳунару таҷриба ва бартарияти худро нишон диҳанд ва ҷойи намоёнро ишғол намоянд.
Ҳадаф аз ташкилу роҳандозии ин гуна мусобиқаҳои ҳарбӣ-варзишӣ ин пеш аз ҳама ҳифзи сиҳатӣ ва обутоби ҷисмонии сарбозон баҳри сарбаландона ва бечунучаро ба ҷо овардани вазифаҳои хизматӣ буда, гузашта аз ин, бо ин васила омодагии доимии онҳоро дар роҳи ҳифзу ҳимояи ватан нишон медиҳад. Ин гуна мусобиқаҳои варзишӣ ҳамзамон имкони дигаре барои баланд бардоштани рӯҳияи ҳарбӣ-ватандӯстӣ ва рушди варзиш дар Артиш дониста мешавад.
Ҳамин тавр, зимни ҷамъбасту натиҷагирии мусобиқаи мазкур доварони Клуби марказии варзиши артиши Вазорати мудофиа дар алоҳидагӣ ва дар ҳайати дастаҳо беҳтаринҳоро муайян намуда, бо медалу ифтихорнома, туҳфаҳои хотиравӣ ва ҷоми мусобиқа сарфароз гардониданд.
Ҳамзамон, дар доираи тантанҳои ҷашни Истиқлоли давлатӣ ва қадршиносии варзишгарони муваффақи кишвар, ки парчамбардору муаррифгарӣ воқеии давлати ҷавону соҳибистиқлоли мо мебошанд, дар пойгоҳи қисми ҳарбии тобеи Клуби марказии варзиши артиши Вазорати мудофиа чорабинии тантанавӣ доир гардид.
Зимни оғози чорабинӣ масъулини Вазорати мудофиа ғолибони 16 умин чемпионати Артишҳои бо ҳам дӯсти ИДМ-ро барои иштироки фаъолона, ба даст овардани ҷойҳои ифтихорӣ ва баланд бардоштани Парчами давлатии Ҷумҳурии Тоҷикистон дар ин мусобиқаи сатҳи баланд табрику муборакбод намуда, ин пайки шодмонии варзиширо дастоварди арзандаи афсарону сарбозони варзишгари кишвар дар арафаи таҷлил аз солгарди навбатии ҷашни бузургу муқаддаси Истиқлоли давлатии Ватани азизамон арзёбӣ намуданд.
Ҳамин тавр, ғолибони ин мусобиқаи байналмилалӣ аз ҷониби роҳбарияти Вазорати мудофиа бо сипоснома ва туҳфаҳои хотиравӣ қадрдонӣ карда шуданд.
Бояд хотиррасон кард, ки аз 18-ум то 24-уми августи соли равон дар шаҳри Алмаатои Ҷумҳурии Қазоқистон 16-умин чемпионати Артишҳои бо ҳам дӯсти Иттиҳоди Давлатҳои Мустақил баргузор гардид, ки аз Ҷумҳурии Тоҷикистон се варзишгар аз Клуби марказии варзиши артиши Вазорати мудофиа, капитан Хушқадам Хусравов ва сарбозони қаторӣ Сомон Хушдилов ва Қоим Шукронов иштирок намуда, бо гирифтани се ҷойи ифтихорӣ ва сазовор гардидан бо медалҳои тилло, нуқра ва биринҷӣ кишвари азизи моро дар ин мусобиқаи сатҳи баланди байналмилалӣ муаррифӣ намуданд.
Бо дастоварди дигари варзишии ноил гардида, дар он шабу рӯзҳо месазад таъкид кард, ки хизматчиёни ҳарбӣ новобаста аз вазифаву уҳдадориҳои бар зима дошта, пайваста ба варзиш машғуланд ва иштирокчии фаъоли мусобиқаҳои варзишӣ мебошанд.
Аз ҷумлаи ин нафарон, полковник Далер Қосимӣ, афсари комиссариати ҳарбии вилояти Суғд мебошад, ки дар мусобиқаи кушоди Ҷумҳурии Тоҷикистон оид ба пауэрлифтинг аз намуди ёзидан бо даст ширкат варзида, сазовори ҷойи аввал гардидааст.
Барои полковник Қосимӣ ин навъи варзиш писандида аст. Аз ин рӯ, вақтҳои холигии худро дар чунин толорҳо гузаронида, пайваста машқу тамрин менамояд ва дар оянда умед ба муваффақиятҳои бузургро дорад.
Дар интиҳо вобаста ба чунин паёмҳои варзишии афсарону сарбозони Вазорати мудофиаи мамлакат ба ҳамаи варзишгарони меҳани азизамон дар муаррифии давлату миллат ва парафшонии Парчами давлатӣ барор мехоҳем.
Боқӣ ШАРИФӢ,
подполковник
