Соли дуюм аст, ки дар машқгоҳи саҳроии Фахрободи гарнизони Хатлон бо иштироки ҳайати шахсии ҷузъу томи Вазорати мудофиа, мақомоти ҳифзи ҳуқуқ ва сохторҳои қудратии мамлакат мусобиқаи ҳарбӣ — варзишӣ таҳти унвони “Пойгаи қаҳрамонон” доир мегардад.
Мусобиқаи мазкур бо ташаббуси Вазорати мудофиаи кишвар дар асоси Нақшаи чорабиниҳои тайёрии ҷангии Қувваҳои Мусаллаҳи Ҷумҳурии Тоҷикистон барои соли 2022 ва ҷиҳати сазовор пешвоз гирифтани 31 умин солгарди Истиқлоли давлатӣ ташкилу ба роҳ монда шуда, ба он беш аз 100 нафар хизматчиёни ҳарбӣ ва кормандони мақомоти ҳифзи ҳуқуқу сохторҳои қудратии мамлакат ширкат доштанд.
Чорабинии тантанавӣ ба ин муносибат дар майдони сафороии машқгоҳи Фахробод бо сафороиии ҳайати иштирокчиён, таҳти навои Суруди миллӣ ва бо баҷо овардани дигар ойинҳои хоси низомиён оғоз гардид, ки зимни он масъулини Вазорати мудофиаи мамлакат оид ба аҳамияти варзиш ва нақши он дар таъмини сатҳи тайёрии ҷангии низомиён баромад намуда, ба иштирокчиёни ин мусобиқаи ҳарбӣ-варзишӣ дар иҷрои шартҳои пешбинигардида ва омодагии сатҳи баланд дар хизмат ба халқу Ватан барору комёбиҳо таманно намуданд.
Дар қисмати дигари ҷамъомад, аз ҷониби сарбозони яке аз қисмҳои ҳарбии Бригадаи ҳамлаовари десантии Қӯшунҳои зудамали Қувваҳои Мусаллаҳ машқҳои ҳимояи худ аз задухӯрдҳои тан ба тан намоиш дода шуд.
Дар ҷамъбасти чорабинии тантанавӣ ҳайати иштирокчиёни мусобиқаи ҳарбӣ-варзишӣ дар назди минбар гузашти низомӣ доир намуданд. Ҳамин тавр бо поён ёфтани ин қисмати ҷамъомад, мусобиқаи “Пойгаи қаҳрамонон” дар машқгоҳи мазкур расман оғоз гардида, байни дастаҳои яккачини сохторҳои зикргардида ҷараён гирифт.
Пас аз муайян гардидани ҳайати ҳакамон ва дар асоси низомномаи баргузории мусобиқа фаҳмонидани меъёрҳои пешбинигардидаи ин мусобиқаи ҳарбӣ — варзишӣ ба иштирокчиёни он, бо қуррапартоӣ ҳайати дастаҳо ва навбати сабқати онҳо муайян карда шуд.
Тибқи меъёрҳои пешбинигардида, дар рӯзи аввали баргузории мусобиқа дастаҳои иштирокчиро зарур буд, ки дар вақти муайяншуда 24 хати монеадорро бехато дар масофаи 3 километр тай намуда, ҳарчӣ зудтар ба марра расанд.
Хатҳои монеагузар асосан аз деворҳои сангину бетонии сӯрохидор, хандакҳои зеризаминӣ, монеҳои муҳандисӣ, симхор, зинапояи чӯбин, гузаргоҳ байни деворҳо ва гузаштан аз зери мошинҳои зиреҳпӯши ҷангӣ иборат буд, ки иштирокчиён кӯшиш мекарданд зимни гузаштан аз монеаҳои мазкур маҳорати баланд нишон дода, натанҳо донишу таҷрибаи касбии хешро баланд бардоранд, балки омодагии ҳамаҷониба худро дар ҳимояи марзу буми Ватан собит намуда, инчунин дастаи худро ҳамчун иштирокчии фаъоли ин мусобиқаи ҳарбӣ — варзишӣ муаррифӣ намоянд.
Дар асоси шартҳои пешбинигардида ба рӯзи дуюми мусобиқа дастаҳо бо силоҳҳои штатии худ монеаҳои гузошташударо дар масофаи муайян тай намуда, сабқатро байни ҳам идома доданд. Тибқи талаботи ин даври мусобиқа иштирокчиён бо силоҳи вобасташуда хати монеадорро бо дав гузашта мавқеи худро ишғол карданд ва бо амри роҳбари машғулиятҳо ба ҳадафҳои худ аз силоҳҳои оташфишони тапончаи Макаров, автомат ва пулемёти Калашников, милтиқи мерганӣ ва норинҷаки дастии зиддитанкӣ тирпарронӣ намуданд.
Т
авре таъкид карда шуд, мақсад аз ташкилу баргузории мусобиқаи мазкур ин пеш аз ҳама баланд бардоштани сатҳи тайёрии ҷангӣ, дониш ва маҳорату малакаи касбии ҳайати шахсӣ, инкишофи ҳаматарафаи онҳо барои иҷрои вазифаҳои хизматию ҷангӣ ва муайян намудани беҳтарин тирандозҳо аз намудҳои гуногуни силоҳҳои оташфишон дар байни ҳайати шахсии сохторҳои қудратии мамлакат мебошад.
Аз ин ҷост, ки зимни ҷамъбасту натиҷагирии мусобиқаи навбатии ҳарбӣ-варзишии “Пойгаи қаҳрамонон-2022” аз рӯйи ҳисоби даставӣ ғолибон ва беҳтарин нишонгирону тирандозон муайян карда шуда, бо ҷоми мусобиқа ва дигар туҳфаҳои хотиравӣ қадрдонӣ гардиданд.
Боқӣ Шарифзода,
рӯзноманигор
