Дар доираи тадбирҳои ҷашнӣ ба муносибати 33 – солагии Артиши миллӣ ва Рӯзи таъсисёбии Муассисаи давлатии «Мададгори мудофиа» — и Вазорати мудофиаи Ҷумҳурии Тоҷикистон мусобиқаи типарронӣ барои дарёфти «Ҷоми вазири мудофиа» баргузор гардид.
Зимни маросими тантанавии оғози мусобиқа афсарони масъули Вазорати мудофиа аҳамияти ташкил ва гузаронидани чунин сабқатҳои варзиширо барои сайқал додани маҳорат ва малакаи тирандозии ҳайати шахсии Қувваҳои Мусаллаҳ баланд арзёбӣ намуданд.
Ҳадафи доир намудани ин чорабинӣ муайян намудани маҳорати тирпарронии хизматчиёни ҳарбии Дастгоҳи марказии Вазорати мудофиа, Ситоди генералии Қувваҳои Мусаллаҳ, раёсатҳои навъҳои Қувваҳои Мусаллаҳ, Муассисаи давлатии «Мададгори мудофиа», Донишкадаи ҳарбӣ, Литсейи ҳарбӣ ва кафедраҳои ҳарбии назди муассисаҳои таҳсилоти олии касбии давлатӣ аз силоҳи оташфишони таппонча маҳсуб меёфт.
Аз таълимгоҳҳои олии кишвар дар ин мусобиқаи дастаҳои кафедраҳои ҳарбии Донишгоҳи миллии Тоҷикистон, Донишгоҳи байналмилалии сайёҳӣ ва соҳибкории Тоҷикистон, Донишгоҳи аграрии Тоҷикистон ба номи Шириншоҳ Шоҳтемур, Донишгоҳи техникии Тоҷикистон ба номи Муҳаммад Осимӣ, Донишгоҳи давлатии тиббии Тоҷикистон ба номи Абӯалӣ ибни Сино ва Донишкадаи тарбияи ҷисмонии Тоҷикистон ба номи Саидмуъмин Раҳимов иштирок доштанд.
Қобили қайд аст, ки ин ҳама тадбиру иқдомҳо дар самти пешбурд ва роҳандозии чорабиниҳои ҳарбӣ — варзишӣ ба таҳкими суботу амният ва дар маҷмуъ ба мустаҳкам намудани иқтидори мудофиавии мамлакат нигаронида шудааст.
Мутобиқи хулосаи доварони мусобиқа аз рӯи ҷамъбасти натиҷаҳои умумидаставӣ мақоми аввалро дастаи Донишкадаи ҳарбии Вазорати мудофиа, мақоми дуюмро дастаи кафедраи ҳарбии Донишгоҳи давлатии тиббии Тоҷикистон ба номи Абӯалӣ ибни Сино ва мақоми сеюмро дастаи раёсати Қӯшунҳои зудамали Қувваҳои Мусаллаҳ соҳиб гардиданд.
