Дар арафаи таҷлил аз Рӯзи Модарон ва бо ибтикори масъулини Клуби марказии варзишии артиш байни занон-хизматчиёни ҳарбии Дастгоҳи марказии Вазорати мудофиа, Ситоди генералии Қувваҳои Мусаллаҳ, навъи қӯшунҳо ва дигар ҷузъу томи тобеи ин ниҳоди қудратӣ, мусобиқаи варзишӣ аз намуди тенниси рӯйи миз ва шоҳмоту шашка баргузор гардид, ки дар он занону бонувони Артиши миллӣ ширкати фаъолона карда, маҳорату малакаи хешро дар ин самт боз ҳам сайқал доданд.
Қобили зикр аст, ки бахшида ба “Рӯзи Модар” ва дар асоси таҳияи нақша-чорабиниҳо ба муносибати ин ҷашн, дар Вазорати мудофиа, муассисаҳои таълимии ҳарбӣ ва дигар ҷузъу томи Қувваҳои Мусаллаҳ як қатор ҷамъомаду чорабиниҳои фарҳангиву фароғатӣ, варзишӣ ва хотирмону фараҳбахш баргузор карда шуданд, ки зимни анҷоми он ғолибон муайян ва бо медалу ифтихорномаҳо ва дигар тӯҳфаҳои хотиравӣ сарфароз гардонида шуданд.
Умуман, агар ба фаъолияти занону бонувони низомӣ дар ҷузъу томи сохторҳои қудратӣ ва қисму воҳидҳои ҳарбӣ назар афканем, ҳатман бояд ёдовар шуд, ки онҳо дар самти иҷрои вазифаву ӯҳдадориҳои хизматӣ комёб буда, баҳри якпорчагии давлату миллат ва мустаҳкам намудани сулҳу ваҳдат дар ҷомеа гомҳои устувор мегузоранд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
