Дар Клуби ҷумҳуриявии варзишӣ – тирандозии Муассисаи давлатии «Мададгори мудофиа» — и Вазорати мудофиаи Ҷумҳурии Тоҷикистон мусобиқаи бисёрҳарба байни хонандагони муассисаҳои таҳсилоти миёнаи умумии ноҳияҳои шаҳри Душанбе ва шаҳру ноҳияҳои тобеи марказ бахшида ба 33 – солагии таъсисёбии Артиши миллӣ баргузор гардид.
Дар маросими тантанавии оғози мусобиқа афсарони масъули Муассисаи давлатии «Мададгори мудофиа» — и Вазорати мудофиаи Ҷумҳурии Тоҷикистон роҷеъ ба таваҷҷуҳу ғамхории Давлату Ҳукумати ҷумҳурӣ бобати рушду инкишофи намудҳои ҳарбӣ – амалии варзиш ва омода намудани ҷавонон барои мудофиаи Ватан суханронӣ намуданд.
Таъкид шуд, ки тарбияи ҷавонони миллатдӯсту ватанпарвар, ки дар худ нерӯи созандагиву бунёдкориро таҷассум менамоянд, бояд чун омили муҳимтарини таҳкими пояҳои давлатдорӣ, пешрафти ҷомеа ва таъмини зиндагии арзандаи халқи бузургворамон арзёбӣ гардад.
Иштирокчиёни мусобиқаи бисёрҳарбаи аз рӯи намудҳои тирандозӣ аз силоҳи варзишӣ, ба қисмҳо ҷудо намуда, дубора ҷамъ намудани силоҳи таълимии Калашников байни худ сабқат намуданд.
Қобили зикр аст, ки яке аз самтҳои ойинномавии фаъолияти Муассисаи давлатии “Мададгори мудофиа” – и Вазорати мудофиа ин рушди варзиш ва ҷалби наврасону ҷавонон ба маҳфилу клубҳои варзишӣ ба шумор меравад.
Ҳадафи баргузории мусобиқаи бисёрҳарба оммавият бахшидани намудҳои ҳарбӣ — амалии варзиш миёни наврасону ҷавонон, омода намудани онҳо барои хизмат дар сафи артиш ва дарёфти истеъдодҳои наву умедбахш маҳсуб меёфт.
Ҷараёни гузаронидани ин чорабинии варзишӣ нишон дод, ки ширкаткунандагон барои иштироки фаъолона ва дастёбӣ ба музаффарияти дастаи худ талош намуда, шартҳои мусобиқаро бо шавқу рағбати зиёд иҷро намуданд.
Азму талош дар ҷодаи ба тарбияи ҳарбӣ – ватандӯстӣ ва намудҳои ҳарбӣ – техникии варзиш ҷалб намудани ҷавонон имкон хоҳад дод, ки онҳо аз машғул шудан ба кору амал ва зуҳуроти номатлуб даст кашида, ҳамчун насли ватандӯст, хушахлоқу солим ва ҷӯяндаву варзишдида тарбия ёфта, ҳомиёни содиқу боэътимоди Ватани маҳбубу мустақиламон гарданд.
