Ба муносибати 80-умин солгарди Ғалаба дар Ҷанги дуюми ҷаҳон, дар толори асосии Вазорати мудофиаи мамлакат вохӯрии вазири мудофиа генерал — лейтенант Эмомалӣ Собирзода бо собиқадорони ин ниҳоди қудратӣ доир гардид.
Зимини ифтитоҳи чорабинӣ вазири мудофиа тамоми иштирокчиёнро, ки солиёни зиёд дар вазифаҳои гуногуни ҷузъу томи Қувваҳои Мусаллаҳи мамлакат адои хизмат намудаанду имрӯз дар нафақа қарор доранд, ба Вазорати мудофиа хайрамақдам гуфта, онҳоро бо ин рӯз табрику таҳният намуд.
Дар идома раиси Шӯрои собиқадорони Вазорати мудофиа полковники мустаъфӣ Ҳайдарқул Худойқулов ҳисоботи семоҳаи шӯро дар соли 2025-ро ба самъи ҳозирин расонида, барои дастгирии пайваста ба роҳбарияти вазорат изҳори сипосу миннатдорӣ баён дошт.
Бояд қайд кард, ки Шӯрои собиқадорони Вазорати мудофиа ташкилоти ҷамъиятӣ буда, 27-уми марти соли 2006 бо мақсади таъмини эҳтиёҷоти маънавӣ, талаботҳои қонунӣ ва таъмини мавқеи муносиби собиқадорон дар ҷамъият созмон дода шудааст.
Зимни суханронӣ аз собиқадорон даъват ба амал оварда шуд, ки пайваста дар қисму воҳидҳои низомии наздик ба маҳалли зисти хеш бо сарбозон ва афсарони ҷавон вохӯриҳо доир намуда, бо истифода аз таҷрибаи бойи андӯхтаи хеш онҳоро ба дӯст доштани марзу бум ва садоқату самимият ба Ватан раҳнамун созанд.
Ҳамзамон, ба афсарон ва масъулини қисмҳои низомӣ ва дигар муассисаҳои ҳарбии кишвар дастур дода шуд, ки ҳамкориро бо собиқадорон зич ба роҳ монда, мулоқоту вохуриҳояшонро бо хизматчиёни ҳарбӣ пайваста таъмин намоянд.
Дар идомаи ҷамъомад ба собиқадорони соҳа туҳфаҳои хотиравӣ тақдим карда шуд, ки боиси хурсандии онҳо гардид.
Шоҳин ШАРИФЗОДА
