Бо ибтикори Донишкадаи ҳарбии Вазорати мудофиаи Ҷумҳурии Тоҷикистон, Конференсияи ҷумҳуриявии илмӣ-назариявӣ дар мавзӯи «Нақши Бобоҷон Ғафуров ҳамчун шахси покзамир ва олими дурандеш», ки дар ҳошияи суханрониҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар Симпозиуми байналмилалии «Бобоҷон Ғафуров-бузургтарин муҳаққиқ ва муаррифгари таърихи халқи точик», ба ифтихори 115-солагии академик Бобоҷон Ғафуров, баргузор гардид, дар кори он намояндагон аз Академияи миллии илмоҳои Тоҷикистон, Маркази исломшиносӣ дар назди Президенти Ҷумҳурии Тоҷикистон ва Донишгоҳи давлатии омӯзгории Тоҷикистон ба номи Садриддин Айнӣ ширкат варзиданд.
Масъулини Донишкадаи ҳарӣ баъд аз садо додани Суруди миллӣ ба кори конференсия ҳусни оғоз бахшида, ҳайати меҳмононро ба ин боргоҳи илми ҳарбӣ хайрамақдам гуфтанд.
Иштирокчиён зимни баромади худ дар мавзӯъҳои “академик Бобоҷон Ғафуров муаррих ва муаррифгари таърихи тоҷикон дар арсаи ҷаҳонӣ”, “Саҳми Бобоҷон Ғафуров дар тамаддуни башарият” ва “Муборизаи халқи тоҷик ба муқобили истилогарони Чинӣ ва инъикоси он дар китоби “Тоҷикон”-и академик Бобоҷон Ғафуров” маърӯзаҳои пурмазмун намуда, қайд карданд, ки “Тоҷикон”-и аллома Бобоҷон Ғафуров воқеан шиносномаи миллати тоҷик аст, ки моро дар арсаи ҷаҳонӣ муаррифӣ намуд.
Воқеан, шоҳасари академик Бобоҷон Ғафуров «Тоҷикон» на танҳо дар таърихнигории ватанӣ, балки дар миқёси кишварҳои хориҷӣ низ шуҳрату шаҳомати беандозаро дорад. Боиси ифтихори мо аст, ки роҳбари маҳбуби кишварамон арзишҳои фарҳангии гузаштаи миллатро ҳамеша мавриди эҳтиром қарор медиҳанд, ки ин далели фарҳангпарвариву меҳандӯстист. Яке аз хизматҳои бузурги Пешвои муаззами миллат дар ин самт нашр ва тақдими китоби “Тоҷикон” ба ҳар оилаи тоҷик буд, ки воқеан самар овард. Мардум аз гузаштаи худ огоҳии амиқ пайдо намуданд ва гузаштаи миллати мо воқеан омӯхташавандаву пурифтихор аст.
Дар фарҷоми кори конференсия ҳайати иштирокчиён барои ширкати фаъолона ва баррасиву пешниҳоди маърӯзаҳои пурмазмун бо сипосномаҳо қадрдонӣ гардиданд.
Шоҳин ШАРИФОВ
