Литсейи ҳарбии Вазорати мудофиаи Ҷумҳурии Тоҷикистон ба номи генерал-майор Мастибек Тошмуҳаммедов ягона мактаби низомиёни наврас дар кишвар аст, ки барои дар оянда ҳамчун афсари касбӣ гардидани ҷавонону наврасон заминаи мустаҳкам мегузорад. Ин аст, ки масъулини ин боргоҳи илми ҳарбӣ пайваста кӯшиш ба харҷ медиҳанд, аз роҳу усулҳои муосири таълим истифода намоянд, то ки тарбиятгирандагон соҳибмаърифату соҳибмалака ба камол расанд.
Бо ин мақсад ва ҳамзамон бахшида ба 30-юмин солгарди таъсисёбии Қувваҳои Мусаллаҳи мамлакат дар Литсейи ҳарбии Вазорати мудофиа дарси кушоди тарбиявӣ-намунавӣ аз фанни забони англисӣ таҳти унвони “Мо ояндаи Ватанем!” гузаронида шуд. Дар ҷараёни дарси кушод гурӯҳи тарбиятгирандагони ҷалбгардида, аз худ малакаи баланд нишон дода, фикру андешаҳояшонро бо ин забони хориҷӣ озодона баён мекарданд.
Бояд тазаккур дод, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон зимни ҳар вохӯрии худ бо насли ҷавон таъкид месозанд, ки имрӯз ҳар ҷавони худогоҳу хештаншиноси меҳанро зарур аст, ки дар баробари забони модарии худ ду-се забони хориҷиро низ пурра аз худ намояд. Тарбиятгирандагони Листейи ҳарбӣ низ ин ҳидоятҳои пайвастаи Президенти Ҷумҳурии Тоҷикистон, мӯҳтарам Эмомалӣ Раҳмонро сармашқи кори худ қарор дода, пайваста аз пайи омӯзиши забонҳои хориҷиянд.
Дар идомаи дарси кушоди тарбиявӣ-намунавӣ роҳбарияти Литсейи ҳарбӣ баргузории чунин машғулияту дарсҳои кушодро манфиатнок хонда, тарбиятгирандагонро барои боз ҳам бештар омӯхтани фанҳои дақиқ ва забонҳои хориҷӣ раҳнамун сохт.
Саҳначаи тарбиявӣ, ки аз ҷониби тарбиятгирандагони ҳаваскори Литсейи ҳарбӣ пешниҳоди аҳли нишаст гардонида шуд, бозгӯкунандаи ватандӯстӣ ва ҳарчӣ бештар рӯ овардани ҷавонон ба хизмати Модар Ватан буд.
Дар фарҷоми чорабинӣ барои болидахотирии иштирокчиён аз ҷониби тарбиятгирандагон навозиши асбобҳои мусиқӣ ва иҷрои сурудҳои ватандӯстона анҷом дода шуд.
Шоҳин ШАРИФОВ
