Дар Донишкадаи ҳарбии Вазорати мудофиа бахшида ба “Рӯзи Модар” Конференсияи ҷумҳуриявӣ ва илмӣ – амалӣ дар мавзӯи “Модар сарчашмаи ҳаёт ва зиннатбахши зиндагӣ” баргузор карда шуд, ки иштирокчиёни он ҳар яке зимни баромади худ дар назди ҳозирин доир ба саҳми Пешвои миллат дар баланд бардоштани мақоми зан дар ҷомеа, “Нақши зан дар сафи Қувваҳои Мусаллаҳ”, “Мақоми зан дар пешбурди фаъолияти мақомоти корҳои дохилӣ”, “Зан дар даврони Истиқлолият”, “Нақши занонон дар рушди ҷомеа”, “Саҳми олимазанҳо дар рушди илми филология”, “Нақши занон дар пешгирии экстремизм ва терроризм” ва оид ба дигар мавзӯъҳои марбут ба саҳми модарон ва занону бонувон дар ҷомеаи имрӯза маърӯза намуданд.
Дар ҷараёни Конференсияи ҷумҳуриявии илмӣ-амалӣ ва зимни маърӯзаи иштирокчиён, қайд гардид, ки Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон мақому манзалати занону бонувонро хеле баланд арзёбӣ намуда, изҳор доштанд, ки “Модари тоҷик дар тӯли таърихи чандинҳазорсолаи халқамон садҳо ва ҳазорон фарзандони фарзонаву донишманд, ҷоннисору қаҳрамон, далеру ҷасур, ҷавонмарду диловар ва ватандӯсту ватанпарварро ба дунё овардааст, онҳоро тарбия карда, ба камол расонидааст ва барои хизмат ба мардум ва ҷомеаи башарӣ дуои нек додааст”.
Дар робита ба ин тазаккур дода шуд, ки воқеан саҳми модарони тоҷик имрӯз низ дар тарбияи фарзандони бонангу номус ва ватандӯсту ватанпараст бағоят бузург мебошад.
Дар охир аз ҷониби масъулини Донишкадаи ҳарбии Вазорати мудофиа ба як қатор иштирокчиёни конференсияи мазкур ифтихорномаҳо тақдим карда шуд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
