Ҳафтаи равон дар “Кохи афсарон”-и Вазорати мудофиаи мамлакат бахшида ба “Рӯзи ҳуқуқи инсон” ва дар ҳошияи “Соли маърифати ҳуқуқӣ” ва 30-юмин солгарди қабули Конститутсияи Ҷумҳурии Тоҷикистон мизи мудаввар дар мавзӯи “Таъмини ҳифзи ҳуқуқи инсон дар Ҷумҳурии Тоҷикистон” баргузор карда шуд.
Чорабиниро муовини вазири мудофиаи Ҷумҳурии Тоҷикистон генерал-майор Музаффар Раҳимзода ифтитоҳ намуда, доир ба муҳиммияти баргузории он изҳори назар кард.
Дар чорабинии мазкур намояндагон аз Маҷлиси миллии Маҷлиси Олии Ҷумҳурии Тоҷикистон, Ваколатдор оид ба ҳуқуқи инсон дар Ҷумҳурии Тоҷикистон, ташкилоти ҷамъиятии “Маркази ҳуқуқи инсон”, Иттифоқи адвокатҳои Ҷумҳурии Тоҷикистон, Дафтари Барномаҳои Созмони амният ва ҳамкорӣ дар Аврупо ва Дафтари Кумитаи байналмилаии Салиби Сурх дар Тоҷикистон иштирок намуда, маърӯзаҳои пурмазмунро дар самти ҳифзи ҳуқуқи инсон пешкаши иштирокчиён намуданд.
Дар ҷараёни чорабинӣ зикр карда шуд, ки 10-уми декабри соли 1948 дар шаҳри Парижи Фаронса санади таърихӣ-Эъломияи умумии ҳуқуқи инсон қабул гардид ва ҳамасола ҷаҳони муосир ин рӯзро ҳамчун «Рузи ҳуқуқи инсон» ҷашн мегирад. Мақсад аз ҷашнгирии «Рӯзи ҳуқуқи инсон» ва баргузории чорабиниҳо ин пеш аз ҳама ба ҷомеа ва ҳар як фард расонидани аҳамияти эҳтиром ва риоя ҳуқуқи инсон; нақши ҳуқуқи инсон дар таҳким ва рушди ҷомеа ва ҳаёти ҳар як фард мебошад. Дар ҳақиқат нақши ин санади муътабар барои инсоният хеле муҳим ва бузург мебошад.
Пеш аз ҳама Эъломия тавонист, ки сарфи назар аз сохти давлатдорӣ, мафкураву эътиқоди динӣ ва одату анъанаҳои халқҳои ҷаҳон дар худ ҳуқуқу озодиҳои асосии инсонро дар бар гирад ва муқаррар намуд, ки сарфи назар аз ин хусусиятҳои номбаршуда, тамоми инсонҳо аз ҳуқуқу озодиҳои инсонӣ бояд бархурдор бошанд.
Санади мазкур агарчи хусусияти эъломиявӣ дошта бошад ҳам, дар тамоми ҷаҳон ва аз ҷониби кулли одамон ҳамчун санади муътабар қабул шудааст, ки 76 сол мешавад ба халқи ҷаҳон хизмат намуда истодааст.
Дар фарҷом аз ҷониби муовини вазири мудофиа мизи мудаввар натиҷагирӣ карда шуд ва ба иштирокчиён барои пешниҳоди маърӯзаҳои баландмазмун ва равшанӣ андохтан ба бисёр аз масъалаҳои соҳавӣ изҳори сипосу миннатдорӣ баён гардид.
Шоҳин ШАРИФОВ
