Дар маҷлиси мушовара оид ба ҷамъбасти фаъолияти Вазорати мудофиа дар соли 2025 ва вазифаҳо барои соли 2026 котиби Шӯрои амнияти Ҷумҳурии Тоҷикистон, вазири мудофиаи мамлакат, сарпрокурори ҳарбии ҷумҳурӣ, ҳайати мушовара, сардорони раёсату шуъбаҳои Дастгоҳи марказии вазорат, Ситоди генералии Қувваҳои Мусаллаҳ, фармондеҳони навъҳои қӯшун ва масъулини қисму воҳидҳои ҳарбӣ иштирок намуданд.
Дар оғоз вобаста ба ҳамкориву ҳамгироии сохторҳои қудратӣ ва муқомоти ҳифзи ҳуқуқи кишвар дар таъмини мудофиаи давлат, санҷиши ҳолати омодабошии захираҳои эҳтиётии Артиши миллӣ, ташкили чорабиниҳои даъвати ҷавонон ба хизмати ҳатмии ҳарбӣ, ташкилу баргузории машқҳои муштараки низомӣ ва дар ин замина таҳкиму тақвият бахшидани иқтидори мудофиавии мамлакат гузориши сардори ситоди генералии Қувваҳои Мусаллаҳ шунида шуд.
Ҳамин тавр, вобаста ба самтҳои гуногуни фаъолият дар Артиши миллӣ муовинони вазири мудофиа баромад намуда, дар маърузаҳои худ масъалаҳои муҳими соҳавӣ, аз ҷумла таъмини сатҳи баланди омодагии ҷангӣ, риояи қонунияту тартиботи ҳуқуқӣ, интизоми ҳарбӣ, таҳкими худшиносии миллӣ, беҳдошти вазъи иҷтимоӣ, сатҳи баланди таъминоти ақибгоҳӣ, самаранок истифода бурдани заминҳои хоҷагии ёрирасон, шароити моддӣ — маишӣ ва ҳолати омодагии ҷузъу томи техникиро мавриди баррасӣ қарор доданд.
Дар идома муовини прокурори генералӣ – сарпрокурори ҳарбии Ҷумҳурии Тоҷикистон Ҳаётзода Фирдавс баромад намуда, доир ба дастгириҳои ҳамаҷонибаи роҳбарияти давлату Ҳукумати кишвар нисбати хизматчиёни низомӣ, ба андозаи 20 фоиз баланд шудани маоши вазифавии онҳо ва дигар масъалаҳои муҳими соҳавӣ андешаронӣ кард.
Ҳамзамон таъкид шуд, ки таъмини интизоми ҳарбӣ, дар сатҳи баланди касбӣ иҷро намудани вазифаҳои хизматӣ, бо садоқату масъулияти баланд таъмин намудани амнияти давлат, ҳифзи дастовардҳои замони соҳибистиқлолӣ ва боз ҳам баланд бардоштани ҳисси худшиносиву худогоҳии афсарону сарбозон, имрӯз аз ҳарвақта дида, масъулияти бештарро тақозо менамояд.
Вазири мудофиаи Ҷумҳурии Тоҷикистон, генерал-полковник Собирзода Эмомалӣ дар баромади худ нахуст аз рӯйдодҳои муҳими соли сипаригардида, ки зимни Паёми навбатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ ироа гардид, ёдовар шуда, таъкид намуд, ки соли сипаригашта барои Вазорати мудофиа соли бобарор ва хотирмон ба ҳисоб меравад, зеро дар ин давра дар доираи дастуру супоришҳои Сарфармондеҳи Олии Қувваҳои Мусаллаҳ, генерали артиш муҳтарам Эмомалӣ Раҳмон пешравиҳои зиёд ба амал омаданд.
Котиби Шӯрои амнияти Ҷумҳурии Тоҷикистон, генерал-полковник Юсуф Раҳмон дар ҷараёни ҷаласа иброз дошт, ки давлат ва мардуми Тоҷикистон дар симои хизматчиёни ҳарбии Қувваҳои Мусаллаҳ муҳофизиони воқеии ватанро мебинанд ва ба он эътимод доранд, ки низомиёни Артиши миллӣ бо садоқат ба халқ ва Президенти худ, хизмати содиқонаву софдилонаи хешро идома медиҳанд.
Лозим ба таъкид аст, ки хизматчиёни ҳарбии Вазорати мудофиа ва дигар зерсохторҳои он, таҳти шиори “35-умин солгарди Истиқлоли давлатии Ҷумҳурии Тоҷикистонро бо омодабошии баланди ҷангӣ, корҳои ободониву созандагӣ ва худшиносиву худогоҳии миллӣ пешвоз мегирем” боз ҳам ба дастовардҳои назаррас ноил мегарданд.
Дар қисмати дигари ҷамъомади мазкур ба ғолибони мусобиқаҳои умумиҳарбӣ, муассисаҳои таълимоти ҳарбӣ ва кафедраҳои ҳарбии Вазорати мудофиаи кишвар туҳфаҳои хотиравӣ тақдим карда шуд.
Илҳом АЛИЗОДА,
сардори Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон,
капитан
