11 июн таҳти роҳбарии вазири мудофиаи Ҷумҳурии Тоҷикистон генерал-полковник Собирзода Эмомалӣ маҷлиси мушовараи Вазорати мудофиа баргузор шуд.
Дар ин ҷаласа муовинони вазир, фармондеҳони навъҳои қӯшун, комиссарони ҳарбии вилоятҳо, шаҳру ноҳияҳо, сардорони раёсатҳо ва дигар кормандони масъули ин сохтори қудратӣ иштирок намуданд.
Зимни ҷаласа 4 масъалаи муҳим мавриди таҳлилу баррасии ҳаматарафа қарор гирифт.
Нахуст сардори Ситоди генералии Қувваҳои Мусаллаҳи кишвар, муовини аввали вазири мудофиа баромад намуда, вобаста ба самти босифат иҷро гардидани даъвати шаҳрвандон ба сафи Артиши миллӣ, риояи ҳатмии талаботи Қонуни Ҷумҳурии Тоҷикистон «Дар бораи ӯҳдадории ҳарбӣ ва хизмати ҳарбӣ», ислоҳи камбудиҳои ҷойдошта дар ин самт, пешгирии ҳолатҳои саркашӣ аз хизмати ҳатмии ҳарбӣ, фаъолияти комиссарони ҳарбӣ, ҷалби ҷавонони солим ба хизмати Ватан – Модар ва дигар масъалаҳои вобаста ба самти мазкур таъкид намуд.
Зикр карда шуд, ки аз 28 феврали соли 2026 Фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1999–2008-и Ҷумҳурии Тоҷикистон ба хизмати ҳарбӣ» ба тасвиб расида буд.
Хушбахтона, дар натиҷаи ҳамкории зичи Вазорати мудофиа бо аҳолӣ, фаъолияти босамари комиссариатҳои ҳарбии шаҳру ноҳияҳо, сари вақт дастрас намудани даъватномаҳо, баргузории суҳбату вохӯриҳои пайваста ва саҳми мақомоти дахлдор нақшаи даъвати баҳории шаҳрвандон ба сафи Артиши миллӣ ба санаи 23-юми майи соли ҷорӣ пеш аз муҳлат ба пуррагӣ иҷро гардид ва ҳамчунин фармони мазкур пурра татбиқ шуд.
Дар идома вобаста ба самтҳои дигар, аз ҷумла омодагӣ ба сафарбарӣ ва сафарбарӣ, идомаи корҳои омӯзишӣ дар самти мазкур, санҷиши ҳолати техникаҳои хоҷагии халқ, баргузории машғулиятҳои амалӣ – тирпаронӣ, пуррагардонии ҷузъу томҳои Қувваҳои Мусаллаҳи кишвар, доир намудани машқҳои муштарак бо сохторҳои қудратии мамлакат, боз ҳам баланд бардоштани сатҳи маърифатнокии захираҳои сафарбарӣ, риояи талаботи пӯшидани сарулибоси низомӣ, вазъи қонуният, тартиботи ҳуқуқӣ ва интизоми ҳарбӣ таваҷҷуҳи махсус равона карда шуд.
Ҷалби ҷавонон ба муассисаҳои олии ҳарбии дохил ва хориҷи кишвар, аз ҷумла Донишкадаи ҳарбӣ ва Литсейи ҳарбии Вазорати мудофиа муҳим арзёбӣ гардид.
Таъкид рафт, ки таҳсил дар ин ду муассисаи таълимии ҳарбӣ ройгон ба роҳ монда шуда, сол то сол бо назардошти зиёд гардидани шумораи хоҳишмандон ихтисосҳои нав низ таъсис дода шудаанд ва ин иқдом идома дорад.
Бо назардошти дастуру ҳидоятҳои Президенти Ҷумҳурии Тоҷикистон, муҳтарам Эмомалӣ Раҳмон ва фароҳам будани шароити арзандаи кору хизмат дар сафҳои Артиши миллӣ, роҳбарияти Вазорати мудофиа ба самти омода намудани кадрҳои баландихтисос, забондон, бо маҳорату пуртаҷриба, ҷалби шаҳрвандони солим ба хизмати ҳатмии ҳарбӣ, хизмат дар намуди захираҳои сафарбарӣ, санҷиши вазъи саломатии онҳо, дар сатҳи баланд ба роҳ мондани корҳои таблиғотиву ташвиқотӣ, бештар доир намудани суҳбату вохӯриҳои судманд бо аҳолӣ, ба шаҳрвандон фаҳмонидани моҳияти хизмати ҳарбӣ, ҳифзи сулҳу Истиқлолияти комили давлатӣ, боз ҳам баланд бардоштани ҳисси ватандӯстӣ дар миёни хизматчиёни низомӣ ва аҳолӣ таваҷҷуҳи бештар зоҳир намуданд.
Ҳамчун мутахассисони касбӣ омода намудани сарбозону афсарон, пуррагардонии қисму воҳидҳои низомӣ аз ҳисоби сарбозону афсарони дорои малакаи баланди касбӣ, омодагӣ ба давраи тирамоҳу зимистони дарпешистода аз масъалаҳои дигари ҷаласаи имрӯза буд, ки мавриди таҳлил ва баррасии амиқ қарор гирифтанд.
Илҳом АЛИЗОДА,
сардори Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон,
капитан
