Баҳри иҷрои дастуру супоришҳои Президенти Ҷумҳурии Тоҷикистон, Пешвои миллат, Сарфармондеҳи Олии Қувваҳои Мусаллаҳи кишвар, генерали артиш муҳтарам Эмомалӣ Раҳмон ҷиҳати омодагӣ ба Паради ҳарбӣ, ки ба муносибати таҷлили сазовори ҷашни 35-солагии Истиқлоли давлатӣ баргузор мешавад, дар Вазорати мудофиа таҳти раёсати котиби Шурои амнияти Ҷумҳурии Тоҷикистон, генерал-полковники адлия Юсуф Раҳмон маҷлиси машваратӣ баргузор шуд.
Дар ин маҷлис роҳбарияти Вазорати мудофиаи Ҷумҳурии Тоҷикистон, сохторҳои қудратӣ, мақомоти ҳифзи ҳуқуқ, фармондеҳони навъҳои Қувваҳои Мусаллаҳ, роҳбарияти вилоятҳо ва шаҳру ноҳияҳои ҷумҳурӣ ба таври ҳузурӣ ва фосилавӣ иштирок доштанд.
Зимни ҷаласа сатҳи омодагии ҳайати шахсӣ, ҳамоҳангии ҷузъу томҳои ҳарбӣ, тартибу интизоми сафороӣ ва иҷрои унсурҳои асосии ин чорабинии муҳими давлатӣ муҳокима гардида, ба масъулон ҷиҳати боз ҳам дар сатҳи баланд роҳандозӣ намудани тамринҳои омодагӣ ба Паради ҳарбӣ дастуру супоришҳои мушаххас дода шуд.
Қайд кардан зарур аст, ки имсол ба истиқболи ҷашни 35-солагии Истиқлоли давлатӣ дар марказҳои маъмурии вилоятҳо ва шаҳру ноҳияҳои ҷумҳурӣ низ бо иштироки масъулини мақомоти иҷроияи ҳокимияти давлатӣ, вазорату идораҳо ва ташкилоту муассисаҳо гузашти оммавӣ доир мегардад.
Роҳбарияти вилоятҳо ва шаҳру ноҳияҳои ҷумҳурӣ бо ҷонибдорӣ аз сиёсати имрӯзаи роҳбарияти давлату Ҳукумати кишвар, ҳифзи дастовардҳои даврони соҳибистиқлолӣ, амнияту суботи ҷомеа ва таъмини фазои идона, омодагии ҳамаҷонибаи худро ба ин чорабинии муҳими сиёсӣ бо хушнудӣ баён доштанд.
