Баҳри омодагӣ ва дар сатҳи баланд ташкилу гузаронидани машқҳои муштараки амалиётӣ — стратегии «Ҳамкорӣ — 2026» бо Қӯшунҳои гарнизони Хатлон ва минтақаи мудофиаи ҳудудӣ дар машқгоҳи “Ҳарбмайдон” аз тарафи Вазорати мудофиаи Ҷумҳурии Тоҷикистон шароити мусоид фароҳам оварда шуд.
Дар марҳилаи якуми машқҳо ҷузъу томи моддӣ — техникӣ, ҳайати шахсии иштирокчии машқҳо ва ҳамзамон гурӯҳҳои асосӣ — амалиётии Вазорати мудофиа ба мавзеи муайяншуда сафарбар карда гардида, санаи 6-уми апрели соли ҷорӣ Қӯшунҳои гарнизони Хатлон ва ҳайати шахсии захираҳои сафарбарӣ бо ишораи бонги хатари таълимӣ ба дараҷаи омодабошии ҷангӣ гузаронида шуданд.
Вобаста ба иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон оид ба татбиқи сиёсати мудофиавии кишвар ва баланд бардоштани сатҳи омодабошии ҷангии ҷузъу томи Артиши миллӣ, сардори Ситоди генералии Қувваҳои Мусаллаҳи Ҷумҳурии Тоҷикистон дар Ситоди минтақаи мудофиаи ҳудудӣ баромад намуд.
Таъкид шуд, ки ҳамаи марҳилаҳои машқҳо ва чорабиниҳои ба нақша гирифташуда бо ҷалби шаҳрвандони дар эҳтиёт қарордошта, дар сатҳи баланд ташкилу гузаронида шавад, то ки вазифаҳои дар машқҳои муштараки низомӣ пешбинигардида бо муваффақият иҷро гарданд.
Бояд ёдовар шуд, ки дар Ситоди минтақаи мудофиаи ҳудудӣ аъзои ситод, масъулини сохторҳои қудратӣ ва мақомоти иҷроияи ҳокимияти давлатии вилояти Хатлон иштирок намуда, зимни он масъалаҳои муҳим ва марбут ба машқҳои муштарак мавриди муҳокима қарор гирифт.
Он рӯз роҳбарияти Ситоди генералии Қувваҳои Мусаллаҳи Ҷумҳурии Тоҷикистон дар пойгоҳи яке аз қисмҳои ҳарбии Қӯшунҳои хушкигарди Вазорати мудофиаи мамлакат воқеъ дар гарнизони Хатлон аз фаъолияти нуқтаи идоракунии Гурӯҳи қӯшунҳои муттаҳида дидан намуда, рафти машқҳои фармондеҳӣ — ситодиро дар ин пойгоҳ назорат карданд.
Пас аз гузориши роҳбари машқҳо, баҷо овардани саломи ҳарбӣ аз ҷониби ҳайати шахсӣ ва садо додани Суруди миллӣ дар ҷамъомади тантанавӣ ба марҳилаҳои фаъоли машқҳои муштараки сохторҳои қудратӣ дар ин гарнизон оғози расмӣ бахшида шуд.
Дар заминаи дастгириҳои доимӣ ва таваҷҷӯҳу ғамхориҳои пайвастаи Сарвари давлат нисбат ба хизматчиёни ҳарбӣ, сардори Ситоди генералии Қувваҳои Мусаллаҳ-муовини якуми вазири мудофиаи Ҷумҳурии Тоҷикистон, генерал-лейтенант Саидзода Бобоҷон зимни баромади худ дар назди иштирокчиёни машқҳои мазкур таъкид кард, ки ҳайати шахсии афсарону сарбозони Артиши миллиро зарур аст чун ҳарвақта ҳушёру зирак бошанд, бо садоқат ба халқу Ватан ва Президент вазифаҳои хизматии хешро бо нерӯйи тоза ва иродаи матину устувор иҷро намоянд.
Авҷ гирифтан ва доман густурдани террорризму экстремизм дар минтақа ва ҷаҳон, ки зуҳуроти хатарноки замони имрӯза маҳсуб мешавад, ҳар як хизматчии низомиро водор менамояд, ки малакаи касбии хешро боз ҳам баланд бардошта, дар дифои Ватан ҳамеша омода бошад, иброз гардид зимни баромад.
Дар идома афсарону сарбозони иштирочии машқҳо бо ифтихор ва рӯҳияи ватандӯстона дар назди минбар гузашти низомӣ доир намуданд.
Дар як вақт бо ташкилу баргузории тамринҳои баталионӣ — тактикӣ ва омодагӣ ба даври ниҳоии машқҳои муштараки амалиётӣ – стратегии “Ҳамкорӣ-2026” дар машқгоҳи “Ҳарбмайдон”, ҳамчунин дар тамрингоҳи “Сумбула” — и гарнизони Хатлон ҷамъомади амалиётӣ — сафарбарӣ бо ҳайати ситоди минтақаи мудофиаи ҳудудӣ, масъулини мақомоти иҷроияи ҳокимияти давлатии шаҳру ноҳияҳо ва сохторҳои қудратӣ роҳандозӣ карда шуда, дар пойгоҳи Маркази таълимии “Ҳалқаёр”-и Қӯшунҳои сарҳадӣ бошад, машқҳои муштараки махсус бо дастгоҳҳои парвозкунанди бесарнишин, муҳорибаи радиоэлектронӣ, разведка, маҳалнигорӣ, артиллерия ва алоқа бо тирпарронии ҷангӣ доир гардид.
Ҷамъомади амалиётӣ — сафарбарӣ, ки дар доираи машқҳои муштараки “Ҳамкорӣ-2026” ва силсилачорабиниҳо вобаста ба омодагӣ ба сафарбарӣ ва сафарбарӣ, ташкили мудофиаи ҳудудӣ ва роҳандозӣ намудани ҳамкориву ҳамоҳангии ҳамаи сохторҳои идоракунии маҳаллӣ доир гардид, дар он раисони шаҳру ноҳияҳо, комиссариони ҳарбӣ, сардорони шуъбаҳои корҳои дохилӣ, мақомоти амнияти миллӣ, сардорони ситодҳои ҳолатҳои фавқулодда ва мудофиаи граждании шаҳру ноҳияҳои вилояти Хатлон иштирок намуданд.
Пойгоҳи баргузории ҷамъомади мазкур, яъне тамрингоҳи Сумбулаи гарнизони Хатлон барои ташкили ҳама гуна машғулиятҳои амалии таълимӣ мусоид буд. Аз ин рӯ, бо истифода аз шароити мусоиди фароҳам овардашуда дар ин машқгоҳ ҳайати иштирокчиёни он дар назди афсарони бомаҳорату соҳибтаҷрибаи Раёсатии тайёрии ҷангии Вазорати мудофиаи аз навъҳои мухталифи аслиҳаҳои ҷангӣ тирпарронӣ намуданд.
Ҳамзамон, бо мақсади баланд бардоштани сатҳи омодабошии сафарбарии мақомоти маҳалли идоракунии ҳарбӣ ва санҷиши сатҳи тайёрии ҳарбии шаҳрвандони дар эҳтиёт қарордошта, бо ташкили шароити мусоид дар пойгоҳи яке аз қисмҳои ҳарбии Қӯшунҳои хушкигарди Қувваҳои Мусаллаҳи мамлакат дар гарнизони Хатлон, чорабиниҳо доир ба омӯзиши захрираҳои сафарбарӣ низ ташкилу ба роҳ монда шуд.
Дар робита ба ин бояд таъкид кард, ки қувваю воситаҳои мудофиаи ҳудудӣ дар баробари қисму воҳидҳои Қувваҳои Мусаллаҳ дар таъмини амнияти кишвар нақши муҳим дошта, омодагии сохторҳои мудофиаи ҳудудӣ ва ташкили босифати чорабиниҳои сафарбарӣ дар партави таваҷҷӯҳи доимии Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон қарор доранд.
