20/04/2021
Аз 19 то 23 апрели соли 2021 дар асоси Нақшаи тасдиқнамудаи Президенти Ҷумҳурии Тоҷикистон — Сарфармондеҳи Олии Қувваҳои Мусаллаҳ Эмомалӣ Раҳмон ва бо мақсади амалан санҷидани иҷрои вазифаҳои ҷангии ҷузъу томҳо дар ҳудуди 25 шаҳру навоҳии вилояти Хатлон ва се машқгоҳи низомии ҳудуди он, бо ҷалби сохтору мақомоти давлативу қудратии ин гарнизон ва ҷузъу томҳои Қувваҳои Мусаллаҳи Тоҷикистону Федератсияи Россия ҷамъомади мудофиаи ҳудудӣ, машғулиятҳои омодагии сафарбарӣ ва маҷмӯи машқҳои муштараки амалиётӣ — стратегӣ ташкилу ба роҳ монда мешавад. Марҳилаҳои асосии баргузории машқҳои муштараки низомӣ дар машқгоҳҳои ҳарбии “Сунбула”, “Ҳомиён” ва “Ҳарбмайдон”-и гарнизони Хатлон пешбинӣ гардидааст.
Дар машқҳои муштараки васеи низомӣ 900 нафар хизматчиёни ҳарбии Қувваҳои Мусаллаҳи ҶТ ва зиёда аз 48 400 нафар захираҳои сафарбарӣ ва қувваю воситаҳои мудофиаи ҳудудӣ ҷалб гардида, ҳамзамон беш аз 1700 нафар низомиёни Пойгоҳи 201-уми ҳарбии Федератсияи Россия барои ҳамоҳангӣ ва амалан санҷидани вазифаҳои ҷангӣ дар ин размоиши низомӣ ширкат менамоянд.
Дар баробари ҷалби беш аз 50 ҳазор нафар ҳайати шахсӣ, инчунин дар ин машқҳои муштараки амалиётӣ — стратегӣ наздики 350 адад техникаҳои зиреҳпӯши ҷангиву махсус, 100 адад тӯп ё худ воситаҳои артиллерӣ, 450 адад техникаҳои автомобилӣ, наздики 20 адад чархболҳу ҳавопаймоҳо, силоҳу муҳимоти мухталифи ҳозиразамони ҳарбӣ ва дигар лавозимоти махсуси низомӣ истифода мешаванд.
Дар доираи баргузории машғулиятҳои омодагии сафарбарӣ ва ҷамъомади мудофиаи ҳудудӣ дар 25 шаҳру ноҳияҳои гарнизони Хатлон Ситод 
ташкил гардида, захираи эҳтиётии даъватшавандагон, шаҳрвандони дар қайди комиссариатҳои ҳарбӣ буда, техникаҳои хоҷагии халқ ва дигар лавозимоте, ки барои баргузории маҷмӯи ин чорабинии низомӣ заруранд, истифода мешаванд.
Ҷараёни баргузории тамоми амалиёти сохтору мақомоти ба машқҳо ҷалб гардида ва омӯзиши мавзӯъҳои ба он пешбинишуда, аз ҷониби масъулини Ситоди генералии Қувваҳои Мусаллаҳи Ҷумҳурии Тоҷикистон идора мегардад.
Ҳадафи доир намудани маҷмӯи машқҳои муштараки амалиётӣ — стратегӣ ва ҷамъомади мудофиаи ҳудудӣ, ин сайқал додани таҷрибаи ҳайати шахсӣ дар ташкили амалиёти бомуваффақонаи ҷангӣ, ҳамоҳангии сохторҳои низомии мамлакат дар сурати ба вуқӯъ пайвастани хатарҳои эҳтимолӣ, вусъат додани қувва ва воситаҳои минтақаҳои мудофиаи ҳудудӣ, сафарбарии қӯшунҳо дар самти доир кардани унсурҳои мухталифи ҷангиро дар минтақаҳои сарҳадӣ, шароити дашту саҳро ва кӯҳистони ҳудуди ҷумҳурӣ дар бар мегирад.
