Дар асоси Нақша-чорабиниҳои тасдиқнамудаи Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон ва бо мақсади амалан санҷидани иҷрои вазифаҳои ҷангии Артиши миллӣ, аз аввали моҳи апрели соли 2025-ум, дар ҳудуди 25 шаҳру навоҳии вилояти Хатлон ва машқгоҳҳои низомии Ҳарбмайдону Сумбула, бо ҷалби сохтору мақомоти давлативу қудратии ин гарнизон ва ҷузъу томи Қувваҳои Мусаллаҳи Тоҷикистону пойгоҳи ҳарбии 201-уми Федератсияи Россия, ҷамъомади мудофиаи ҳудудӣ, машғулиятҳои омодагии сафарбарӣ ва машқҳои муштараки амалиётӣ-стратегӣ дар 5 марҳила ба таври назариявию амалӣ ҷараён дорад, ки ба он қувваҳои эҳтиётӣ, ҳайати шахсии сохторҳои қудратӣ ва мақомоти ҳифзи ҳуқуқи ин гарнизон ҷалб карда шудаанд.
Дар робита ба ин дар марҳилаи якум сатҳи тайёрии ҷангии ҷузъу томҳои гарнизони Хатлон ҳангоми бонги хатар ва гузаронидани тамоми қӯшунҳо ба дараҷаҳои омодабошии баланди ҷангӣ, амалан мавриди санҷиш қарор гирифтанд.
Дар марҳилаҳои дуюм ва сеюми машқҳои муштараки амалиётӣ-стратегӣ бошад, аз ҳисоби захираҳои сафарбарӣ ташкилу густариш додани қисмҳои ҳарбии таъиноташон гуногун ва вобаста ба ихтисосҳои низомӣ пуррагардонии ҳайати ҷузъу томи навтаъсис сурат гирифт.
Ҳамзамон, дар доираи баргузории ҷамъомади амалиётӣ–сафарбарӣ ва мудофиаи ҳудудӣ, ки марҳилаи чоруми ин размоиши низомиро дар бар мегирифт, раисони 25 шаҳру ноҳияҳои вилояти Хатлон, комиссарони ҳарбӣ, сардорони шуъбаҳои корҳои дохилӣ ва Кумитаи давлатии аманияти миллӣ, Ситоди ҳолатҳои фавқулодда ва мудофиаи граждании ин минтақаҳо дар пойгоҳи яке аз қисмҳои низомии Қӯшунҳои хушкигард ва машқгоҳи ҳарбии Сумбула ба дарсу таълимоти гуногуни назариявӣ ва ҳам ба ҷамъомаду машғулиятҳои амалии саҳроии ҳарбӣ ҷалб карда шуданд.
Ҷараёни баргузории тамоми амалиёти ба машқҳо пешбинишуда ва омӯзиши мавзӯъҳои ба он муайянгардида аз ҷониби Ситоди генералии Қувваҳои Мусаллаҳи идора мешаванд ва рафти ҳама марҳилаҳои ин размоиши низомӣ ва матлаби ба он пешбинишуда таҳти назорати роҳбарияти Вазорати мудофиаи мамлакат қарор дорад.
Дар доираи татбиқи амалии марҳилаи панҷуми ин чорабинии муҳими низомӣ, ки баргузории он рӯзи 11-уми апрели соли равон ба нақша гирифта шудааст, айни ҳол ҷузъу томҳои таъиншудаи Тоҷикистону Россия барои дар сатҳи баланд ҷамъбасту натиҷагирӣ намудани маҷмуи машқҳои муштараки амалиётӣ-стратегӣ, дар машқгоҳи низомии “Ҳарбмайдон” омодагии ҳамаҷониба мегиранд.
Фаридун МАҲМАДАЛИЗОДА,
сардори Маркази матбуот ва иттилооти
Вазорати мудофиаи Ҷумҳурии Тоҷикистон,
полковник
