Вобаста ба ҷамъбасту натиҷагирии даври дуюми таҳсил ва дар маҷмӯъ соли хониши 2024, ки он тибқи нақшаи ягонаи омодагии ҷангӣ дар Қувваҳои Мусаллаҳи мамлакат ҷараён дошт, дар машқгоҳи саҳроии “Фахробод”-и гарнизони Хатлон машқҳои баталионӣ-тактикии махсус бо ҷалби ҷузъу томи Қӯшунҳои зудамал дар гарнизони Душанбе доир гардид. Бо мақсади дар сатҳи баланд роҳандозӣ намудани тамринҳои тактикии навбатӣ нуқтаҳои таълимӣ ва идоракуниву фармондеҳии машқҳо дар шароити саҳро ташкил карда шуда, он ба як мавзеи шартии пешбурди амалиёти мусаллаҳона табдил ёфта буд.
Қабл аз оғози марҳилаи фаъоли машқҳо дар тамрингоҳи “Фахробод” нахуст роҳбари машқҳои баталионӣ-тактикӣ аз рӯйи тамсила ё худ макет оид ба вазъияти баамаломада ва ҷиҳати пешгирии он аз роҳу воситаҳои ташкили амалиёти шартӣ ва омодагии қувваву воситаҳои ҷангӣ дар мавзеъҳои таъйиншуда, ба ҳайати фармодеҳии навъи қӯшун гузориш дод.
Тибқи матлаб ҳайати шахсии ҷалбгардида ба машқҳоро зарур буд, ки вобаста ба дастгиру безараргардонии гурӯҳи ғайриқонқунии силоҳбадастон дар хати сарҳади давлатӣ ва қисми паноҳёфтаи онҳо дар маҳалҳои аҳолинишин дар чаҳор марҳила амалҳои тактикӣ доир намоянд. Марҳилаҳои ба нақша гирифташуда асосан зада баргардонидани ҳуҷуми гурӯҳи гайриқонунии силоҳбадастон ба дидбонгоҳи сарҳадӣ, нобудсозии захираҳои наздикшавандаи душман, озод намудани биноҳои маъмурӣ ва маҳалли аҳолинишин аз душманони шартӣ ва дар марҳилаи ниҳоӣ фуруд овардани десанти тактикӣ бо парашут дар ақибгоҳи душманро дар бар мегирифт.
Десантчиёни фазои тактикӣ бошанд, дар ин машқҳо ҳама вазифаву уҳдадориҳои дар наздашон гузошташударо дар ақибгоҳи душман муваффақона иҷро карданд. Баҳри иҷрои ин амал ва вазифаҳои дар машқҳо бар уҳдадошта онҳо тавассути ҳавопаймои АН-2 ва бо истифодаи парашутҳо дар баландии 800 метр фуруд оварда шуданд.
Зимни ҷамъбасти машқҳои баталионӣ-тактикӣ, фармондеҳи Қӯшунҳои зудамал ва дигар шахсони масъул дар назди ҳайати шахсӣ бо қаноатмандӣ изҳор доштанд, ки баҳри дар амал татбиқ намудани ҳама марҳилаҳои пешбинигардида ба машқҳо ҳайати шахсии ҷалбгардида ба он, донишу таҷриба ва маҳорати касбии худро амалан нишон дода, бо қобилияти баланди ҷангӣ вазифаҳои дар наздашон гузошташударо сарбаландона иҷро намуданд.
Машқҳои баталионӣ-тактикии навбатӣ дар машқгоҳи “Фахробод” бо гузашти низомии афсарону сарбозони иштирокчии машқҳо ба поён расид.
Боқӣ ШАРИФӢ,
подполковник
