Ҳафтаи равон, дар машқгоҳи таълимии “Фахробод”-и гарнизони Хатлон бо ҷалби ҷузъу томи Бригадаи ҳамлаовари десантӣ ва Баталиони сулҳҷӯёнаи Қӯшунҳои зудамали Қувваҳои Мусаллаҳи Ҷумҳурии Тоҷикистон машқҳои баталионӣ-тактикӣ ташкилу ба роҳ монда шуд, ки ҳайати шахсии ба ин размоишҳо ҷалбгардида, як қатор унсуҳои зиддитеррористиро амалан коркарду тарҳрезӣ намуданд.
Қабл аз оғози машқҳои мазкур нахуст роҳбарони машғулиятҳо маълумотҳои разведкавии дастрасгардидаро мавриди омӯзиш қарор дода, аз рӯйи тамсила ё худ макет матлаби ба машқҳо пешбинигардидаро мавриди коркард қарор доданд.
Бо оғоз гардидани машқҳо гурӯҳҳои муайяншуда ба иҷрои вазифаҳои дар наздашон гузошташуда равона гардида, пас аз муайян намудани мавзеи ҷойгиршавии душманони шартӣ, ҳайати шахсӣ ба амалиёт шурӯъ намуданд.
Тибқи матлаби баргузории тамринҳои навбатӣ гӯё гурӯҳи ғайриқонунии силоҳбадаст дар биноҳои маъмурӣ мавқеъ гирифта, нақшаи амалинамоии ҳодисаҳои харобкоронаро тарҳрезӣ менамуданд ва гурӯҳи дигар бошанд, бо убури ғайриқонунии сарҳади давлатӣ мехостанд вазъро дар яке аз минтақаҳои масъулиятноки марзӣ ноором созанд. Аз ин рӯ, бо мақсади пешгирӣ аз ҳар гуна хавфу хатар ва зада баргардонидани ҳуҷуми душманони шартӣ байни қувваҳои сулҳхоҳ ва гурӯҳҳои ғайриқонунии силоҳдор муноқишаҳои мусаллаҳона сурат гирифт, ки дар натиҷаи он гӯё душманони эҳтимолӣ дастгиру безарар
гардонида шуданд.
Рафти баргузории машқҳои мазкур аз ҷониби афсарони масъули Раёсати Қӯшунҳои зудамал ва ҳайати роҳбарикунандаи ҷузъу томи ин навъи қӯшун бевосита назорат карда шуда, барои боз ҳам такмилу тақвият бахшидани омодабошии ҷангии гурӯҳҳо, ҳамоҳангии дурусти баталионҳо, ҳангоми пеш бурдани амалиёт ва дигар унсурҳои дар машқҳо амалишаванда ба ширкаткунандагони размоишҳои баталионӣ-тактикӣ маслиҳату дастурҳои мушаххас дода мешуд.
Ба андешаи масъулин мақсади асосии ташкилу роҳандозӣ намудани тамринҳои навбатӣ, ин пеш аз ҳама баланд бардоштани донишу маҳорати тактикии ҳайати шахсӣ ва омодагии доимии онҳо бар зидди хатару таҳдидҳои эҳтимолӣ мебошад.
Зимни ҷамъбасти машқҳои баталионӣ-тактикӣ масъулини Қӯшунҳои зудамали Вазорати мудофиа дар назди ҳайати иштирокчиёни он баромад намуда, ба маҳорати касбиву қобилияти ҷангӣ ва сатҳи омодагии онҳо баҳои муносиб доданд. Таъкид карда шуд, ки ҷиҳати пешгирӣ аз хатарҳои афзояндае чун терроризму 
экстремизм ҳамеша пайи эҷоди роҳҳои муассири такмили касбият бошему баҳри таъмини амнияти устувор талош намоем.
Ҳамин тавр, барои хизматҳои софдилона, иштироки фаъолона дар тамринҳои баталионӣ-тактикӣ ва дастовардҳои назаррас дар иҷрои вазифаҳои хизматӣ як қатор иштирокчиёни фаъоли ин тамринҳо бо ифтихорномаву сипоснома ва мактубҳои миннатдорӣ ба волидон, сарфароз гардонида шуданд.
Расми гузаштии низомии афсарону сарбозон аз назди минбар анҷомбахши машқҳои баталионӣ-тактикӣ гардид.
Боқӣ Шарифов,
майор
