Қувваҳои эҳтиётӣ ё худ захираҳои сафарбарӣ дар сурати эҳтимолияти таҳдиди хатар ба давлат, барои тақвият бахшидани ҳайати Қувваҳои Мусаллаҳи Ҷумҳурии Тоҷикистон, сохторҳои қудратӣ ва мақомоти ҳифзи ҳуқуқи мамлакат нақши калон бозида, дар самти баланд бардоштани иқтидори мудофиавии кишвар саҳми арзанда мегузорад. Дар давоми соли равон, ташкили як қатор чорабиниҳо вобаста ба омӯзиши захираҳои сафарбарӣ нишон доданд, ки ҳазорҳо нафар шаҳрвандони ихтиёрӣ, ба комиссариатҳои ҳарбии маҳалли зист ҳозир шуда, барои ҳимояи марзу буми давлат худро ба қайд гузоштанд.
Аз ҷумла, дар ноҳияи Данғараи вилояти Хатлон, сокинон бо қабули ишораи бонги хатар, бо техникаҳои хоҷагии халқ ба нуқтаҳои ҷамъшавӣ, ки он тибқи матлаби машғулиятҳои омодагии сафарбарӣ ва ҷамъомади мудофиаи ҳудудӣ, фурудгоҳи ин минтақа муайян шуда буд, дар вақту соати муқарраргардида ҳозир шуданд.
Теъдоди иштирокчиёни қувваҳои эҳтиётӣ тибқи ишораи бонги хатар, ки зиёда аз 2500 нафарро ташкил медод, ба гурӯҳҳо тақсим шуда, омодагии хешро барои сафарбар гардидан, ба иҷрои вазифаву уҳдадориҳои ҷангӣ, баён доштанд.
Сардори Ситоди генералии Қувваҳои Мусаллаҳ, сардори минтақаи мудофиаи ҳудудии ноҳияи Данғара ва дигар масъулини мақомоти иҷроияи ҳокимияти давлатии ин ноҳия, зимни суханронӣ ва ҳангоми вохӯрӣ бо аҳолӣ, доир ба ҳадаф ва зарурияти машғулиятҳои омодагии сафарбарӣ ва ҷамъомади мудофиаи ҳудудӣ, изҳори андеша карданд. Аз онҳо тайёрии доимӣ ва ҳамаҷонибаро дар самти баланд бардоштани иқтидори мудофиавии кишвар ва ҳимояи марзу буми аҷдодӣ тақозо намуданд.
Зимни тақсимот ва гурӯҳбандӣ аз ҳисоби 2500 нафар иштирокчиёни ҷамъомад ё худ қувваҳои эҳтиётӣ ва техникаҳои хоҷагии халқ, ки ба ҳудуди фурудгоҳи ноҳияи Данғара интиқол ёфта буданд, як бригадаи мудофиаи ҳудудӣ ва ҳайати захираҳои сафарбарӣ ташкил карда шуданд.
Бо ҳамин тартиб, дар ҳудуди ҷамоатҳои деҳоти Себистону Сангтӯда низ, сокинони он дар шумораи беш аз 350 нафарӣ, ба чунин ҷамъомаду машғулиятҳои ҳарбӣ ҷалб гардида, аз ҳисоби шаҳрвандони ин минтақаҳо низ 2 баталиони мудофиаи ҳудудӣ ва захираҳои сафарбарӣ ташкил карда шуданд. Умуман, зимни баргузории машғулиятҳои омодагии сафарбарӣ ва ҷамъомади мудофиаи ҳудудӣ, дар маҷмӯъ дар ҳудуди ҷамоату деҳот ва ҳудуди ноҳияи Данғара беш 3500 нафар сокинон ҳамчун қувваҳои эҳтиётӣ ҷамъ оварда шуданд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
