Дар шароити ҷаҳони мураккаб ва пуртазод, ҳифзи сулҳу субот, амнияти миллӣ ва дастоварду музаффариятҳои даврони соҳибистиқлолӣ аз ҳар як сокини кишвар масъулияти баланди шаҳрвандиро талаб менамояд.
Ҳама сокинон рисолати пурифтихор ва вазифаи муқаддас доранд, ки он пеш аз ҳама хизмат ба Ватан, ҳифзи оромӣ ва пос доштани сарҳади муқаддаси кишвар аст.
Бо дастгирии ҳамаҷониба ва ғамхориҳои пайвастаи Президенти Ҷумҳурии Тоҷикистон, Пешвои миллат, Сарфармондеҳи Олии Қувваҳои Мусаллаҳи кишвар муҳтарам Эмомалӣ Раҳмон, барои таҳкими неруи мудофиавии мамлакат ва беҳбуд бахшидани шароити хизматии афсарону сарбозон тамоми имкониятҳо фароҳам оварда шудааст.
Имрӯз шаҳрвандон низ дар баробари хизматчиёни ҳарбии Артиши миллӣ ҳифзи Ватан ва ҳимоя аз манфиатҳои давлату миллатро аз вазифаҳои муҳиму аввалиндараҷаи хеш медонад ва бо ин мақсад пайваста дар тамринҳои омодагии сафарбарӣ ва дигар ҷамъомадҳои марбут ба мудофиаи давлат фаъолона ширкат меварзанд.
Баҳри иштирок дар чунин чорабиниҳои банақшагирифташуда аз ҷониби Вазорати мудофиаи мамлакат дар ноҳияи Варзоб беш аз 3000 нафар сокинони касбу кори гуногун ва шаҳрвандони дар эҳтиётбуда, дар Варзишгоҳи марказии ноҳия ҷамъ омада, бо ин амали шоистаи худ масъулияти баланди шаҳрвандии худро нишон доданд.
Ҳайати роҳбарии ҷамъомад аз Ситоди генералии Қувваҳои Мусаллаҳи мамлакат ва масъулини мақомотҳои давлативу қудратии ноҳия дар баробари сӯҳбату вохӯрӣ бо ҳайати захираҳои сафарбарӣ, инчунин аз ҳолати омодагии техникаҳои ҷалбгардида, ки теъдоди умумии он наздики 500 ададро ташкил медод, боздид намуданд.
Бояд қайд кард, ки тибқи қонунгузориҳои давлатӣ дар соҳаи сафарбарӣ ҳангоми зарурият ва ҷалби шаҳрвандон ба чунин ҷамъомаду машғулиятҳои пешбинигардида, ҳамзамон теъдоди муайяни техникаҳои хоҷагии халқ низ бо даъватномаи комиссарити ҳарбӣ даъват ва сафарбар карда мешаванд.
Баҳри иштирок дар ин ҷамъомади муҳими сиёсӣ — ҷамъиятӣ ва нишон додани омодагии ҳамаҷониба дар иҷрои вазифаҳои шаҳрвандӣ як қатор иштирокчиён бо сипоснома ва рутбаҳои навбатии ҳарбӣ сарфароз шуданд.
Ҳама масъалаҳои дахлдори соҳа ва омодагии мақомоти давлатии даъвати ноҳия ба ташкили бомароми чорабиниҳои пешаздаъватӣ, касбомӯзии ҷавонони синни даъватӣ ва ҳамаҷониба омода намудани онҳо ба хизмат дар сафи Қувваҳои Мусаллаҳ зимни баргузории кори ситод дар минтақаи мудофаи ҳудудии ноҳияи Варзоб мавриди таҳлилу баррасӣ қарор гирифт.
