Дар доираи нақша чорабиниҳои Раёсати истифодабарии манзилии Вазорати мудофиа дар ҳамоҳангӣ бо Сарраёсати хадамоти давлатии оташнишонии Вазорати корҳои дохилӣ ва бо ҷалби дастаи ғайриштатии сӯхторхомушкунӣ дар Донишкадаи ҳарбии Вазорати мудофиа ва Литсейи ҳарбии ин ниҳоди қудратии кишвар вобаста ба пешгирӣ аз ҳодисаҳои сӯхтор машғулиятҳои амалии сӯхторнишонӣ доир гардид.
Қабл аз оғози машғулиятҳо дар қисмати назариявии он зикр карда шуд, ки ҳар як фард бояд ҷиҳати таъмини бехатарӣ аз сӯхтор дар хона ва утоқҳои корӣ эҳсоси масъулият намуда, ҳангоми истифода аз қувваи барқу дигар воситаҳои электронӣ эҳтиёткор бошанд. Ҳамзамон, дар идомаи ин ҷамъомад аз воқеаҳои гуногуни аз сӯхтор баамаломада, сабабҳои ба вуқӯъ пайвастан ва зарару оқибатҳои даҳшатбори он мисолҳо оварда шуд.
Сипас, бо иштироки дастаҳои ғайриштатии оташхомӯшкунии муассисаҳои таълимии зикргардида машғулиятҳои омӯзишӣ дар яке аз биноҳо гузаронида шуд. Бо қабули ишора доир ба он, ки сӯхтор ба амал омадааст, ҳайати сӯхторхомушкунон бо автомашинаи зиддисӯхтор ва таҷҳизоти махсуси техникӣ барои таъмини бехатарӣ аз сӯхтор, инчунин бо лавозимоти оташнишониву маводи муҳофизатӣ аз оташ ва дигар воситаҳои алоқаи махсус ба ҷойи ҳодисаи шартии сӯхтор ҳозир шуданд. Онҳо бо истифода аз имкониятҳои мавҷуда омодагии доимии худро нишон доданд.
Ин гуна машғулиятҳо бори дигар ҳайати шахсиро водор менамояд, ки талаботи меъёру стандартҳо, қоидаву дастурҳо оид ба таъмини бехатарӣ аз сӯхторро ҳамеша дар мадди назари худ қарор диҳанд.
Тибқи иттилои масъулин онҳо нақша доранд, ки чунин чорабиниҳои фаҳмондадиҳиву омӯзиширо дар дигар бинову иншооти ҷузъу том ва қисму воҳидҳои ҳарбии тобеи Вазорати мудофиа низ доир намоянд.
Боқӣ ШАРИФОВ
