Дар доираи чорабиниҳои пеш аз даъватӣ ва бо мақсади сифатан хуб ба роҳ мондани ҷалби ҳарчӣ бештари ҷавонписарони солиму бардам ба сафи Қувваҳои Мусаллаҳи ҷумҳурӣ дар толори асосии Вазорати мудофиа ва бо ҷалби комиссарони ҳарбии вилоятҳо ва шаҳру ноҳияҳои мамлакат ҷамъомад баргузор гардид.
Дар ҷамъомад нахуст доир ба дастуру супоришҳои Сарфармондеҳи Олии Қувваҳои Мусаллаҳ генерали артиш муҳтарам Эмомалӣ Раҳмон ва оид ба вазъи ноустувору зудтағйирёбандаи ҷаҳони муосир, роҳбарияти Вазорати мудофиа ибрози назар карда, изҳор дошт, ки дар чунин вазъият ҳар як фарди низомиро мебояд, ки аз ҳарвақта дида дар самти иҷрои вазифаву уҳдадориҳои хизматӣ, бо масъулияти баланд муносибат намоянд ва баҳри боз ҳам тақвият бахшидани тамоми самту соҳаҳои Артиши миллӣ, ки ба сатҳи омодабошии ҷангии Қувваҳои Мусаллаҳи ҷумҳурӣ ва баланд бардоштани иқтидори мудифиавии мамлакат таъсири бевосита мерасонад, ҷаҳду талош намоянд.
Дар доираи таҳлилу натиҷагирӣ аз чорабиниҳои даъватии соли сипаригашта қайд карда шуд, ки дар радифи як қатор комёбиву пешравиҳои назаррас, ҳамоно фаъолияти баъзе аз комиссияҳои даъватӣ боиси нигаронӣ мебошад. Аз ин рӯ, барои бартараф намудани ҳама гуна монеаву мушкилоти ҷойдошта супориш дода шуд, ки масъулини комиссариатҳои ҳарбии вилоятҳо ва шаҳру ноҳияҳои мамлакат, баҳри сифатан хуб ташкилу ба роҳ мондани чорабиниҳои даъватӣ, пеш аз ҳама дар ҳамоҳангӣ бо мақомоти масъули вобастаи даъват ва масъулини мақомоти иҷроияи ҳокимияти давлатӣ ҳамкориро бо мардум, ҷавонони синни даъватӣ, волидони онҳо ва дигар афроди некбини ҷомеаи имрӯза боз ҳам ҷоннок намуда, дар миёни аҳолӣ корҳои фаҳмондадиҳӣ ва чорабиниҳои ташвиқотиву тарғиботиро дар самти бедор намудани ҳисси худогоҳии худшиносии миллӣ, зарурияти хизмати ҳарбӣ, адои вазифаи ҷавонмардӣ, ҳимояи марзу буми аҷдодӣ ва шукргузорӣ намудан аз ин неъмати бебаҳо, ки музаффариятҳои давлати соҳибистиқлол ва Ватани ободу зебо арзёбӣ мешавад, роҳандозӣ намоянд ва тамоми шароити заруриро барои ҳайати комиссияи даъватӣ муҳайё созанд.
Роҳбарияти Вазорати мудофиа инчунин бо ёдоварӣ аз муроҷиати шаҳрвадон ба унвонии ӯ таъкид намуд, ки дар ҳамаи комиссариатҳои ҳарбӣ, бобати муроҷиат ва ҳалли мушкилоти мардум, ки ба масъалаи даъват ва ба самту соҳаи комиссариатҳои ҳарбӣ вобастагӣ доранд, дар доираи талаботи қонунҳои амалкунанда, саривақт чораҷӯйӣ намоянд.
Фаридун МАҲМАДАЛИЗОДА,
полковник
