Маросими савгандёдкунии сарбозони қисми ҳарбии 08010 дар асоси муқаррароти Оинномаи сафороии Қувваҳои Мусаллаҳи мамлакат бо даровардани Байрақи ҷангӣ ва садо додани Суруди миллӣ оғоз гардид.
Зимнан, ҳар як наваскар дар назди масъулини роҳбарикунандаи навъи қӯшуни хеш, афсарони қисми ҳарбӣ ва падару модарон савганд ёд намуда, қавл доданд, ки сарбози содиқу бошарафи Ватан боқӣ монда, натанҳо давоми хизмат, балки тамоми умр баҳри таъмини суботу амнияти кишвар кӯшиш мекунанд. Зеро, ҳифзу ҳимояи давлат ва таъмини амнияти мардум ҳамеша вазифаи шаҳрванд, хусусан ҷавонони бонангу ор ва муҳофизони он мебошад. Ин ҷавонон низ маҳз бо дарки ҳамин рисолати фарзандӣ имрӯз хизмати ҳарбиро ихтиёр намудаанду масъулияти дифои марзу буми Ватанро пеша намуданд.
Сипас, ҳайати роҳбарикунанда, намояндагони бахшу соҳаҳои гуногуни ҷомеа ва волидону наздикони сарбозон, ин гурӯҳи фарзандони далеру қаҳрамони Ватанро ба муносибати қабули Савганди ҳарбӣ самимона табрику муборакбод намуда, таъкид доштанд, ки маҳз бо шарофати садоқату ҷасорати касбӣ, фидокориву ҷоннисорӣ ва хизматҳои шабонарӯзии хизматчиёни ҳарбӣ дар сарзамини поки ниёгонамон сулҳу субот пойдор аст ва имрӯз ҷомеаи кишвар зиндагии осоишта доранд.
Сарбозон низ дар навбати баромади худ қавл доданд, ки ба савганди ёднамудаи худ содиқ мемонда, меъёру талаботи савганднома ва дигар муқаррароти оинномавии хизматро бо масъулияти баланди сарбозӣ иҷро менамоянд.
Ҳамин тавр, ҷамъомади тантанавии қабули Савганди ҳарбӣ аз ҷониби гурӯҳи наваскарони даъвати тирамоҳии соли равон дар ин қисми низомии 08010-и Қӯшунҳои хушкигард бо гузашти низомии ҳайати шахсӣ ба поён расид.
Боқӣ ШАРИФӢ
