Ҳамасола дар ду мавсим даъвати ҷавонон ба сафи Қувваҳои Мусаллаҳи кишвар сурат мегирад. Наваскарон баъди шомил шудан ба сафи Артиши миллӣ ва гузаштан аз курси кӯтоҳмуддати “Ҷанговари ҷавон” савганди садоқат ба халқу Ватан, яъне Савганди ҳарбиро қабул менамоянд.
Маврид ба зикри хос аст, ки солҳои қабл маросими савгандёдкунии наваскарон дар дохили қисмҳои низомӣ сурат мегирифт. Бо дастуру ҳидоятҳои Пешвои муаззами миллат ва дар асоси нақшаи муштараки Вазорати мудофиаи Ҷумҳурии Тоҷикистон ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон, чорабиниҳои тантанавии қабули Савганди ҳарбӣ аз ҷониби наваскарони даъвати баҳории соли 2025 дар ҷузъу томи Вазорати мудофиа бо ҷалби падарону модарон, намояндагони қишри гуногуни ҷомеа ва иштироки васеи сокинон дар ҳудуди боғҳои фарҳангии шаҳру ноҳияҳои ҷумҳурӣ ба таври шоиставу хотирмон баргузор карда шуд.
Дар баробари дигар шаҳру ноҳияҳои кишвар наваскарони қисму воҳидҳои ҳарбии Вазорати мудофиа дар гарнизони Душанбе низ бо рӯҳияи баланди ватандӯстӣ маросими савгандёдкуниро доир намуданд.
Аз ҷумла, тибқи нақшаи тасдиқгардида чорабиниҳои савгандёдкунии наваскарони қисмҳои ҳарбии тобеи Вазорати мудофиа, Ситоди генералии Қувваҳои мусаллаҳ, навъҳои қӯшуни Артиши миллӣ ва дигар ҷузъу томи алоҳидаи низомии мустақар дар гарнизони Душанбе, дар ҳудуди Муассисаи давлатии “Боғи фарҳангӣ-фароғатӣ”-и ба номи А. Фирдавсӣ, Муассисаи давлатии “Майдони Истиқлол”, Муассисаи давлатии “Боғи Ғалаба ва нигоҳдори ҷангал” ва Муассисаи давлатии “Боғи фарҳангӣ-фароғатӣ”-и ба номи А. Г. Мироненко гузаронида шуд.
Чорабиниҳо чун оини доимии низомиён бо даровардани Байрақи ҷангӣ ба майдонҳои баргузорӣ, таҳти навои Суруди миллӣ, табрикоту таманниёти ҳозирин, гузашти низомӣ ва дигар муқаррароти оинномавӣ ҷараён гирифта, навскарон бо қироати бандҳои пурмуҳтавои матни савганднома қавл доданд, ки то нафасҳои охирин барои халқу Ватани худ содиқонаву софдилона хизмат менамоянд.
Дар идома аз ҷониби ҳунармандони бахши фарҳанги ноҳияҳои пойтахт чорабинии васеи консертӣ пешниҳоди иштирокчиён гардонида шуд.
Шоҳин ШАРИФЗОДА
