Дар Майдони Истиқлоли пойтахт маросими бошукӯҳи савгандёдкунии наваскарони даъвати баҳории соли 2026 дар фазои тантанавӣ ва рӯҳияи баланди ватандӯстӣ баргузор гардид. Дар ин чорабинии муҳими ҳарбӣ–сиёсӣ муовини вазири мудофиаи Ҷумҳурии Тоҷикистон, роҳбарияти мақомоти иҷроияи ҳокимияти давлатии ноҳияи Исмоили Сомонӣ, ҳайати фармондеҳии Қӯшунҳои зудамали Қувваҳои Мусаллаҳ ва намояндагон аз ҳукумати шаҳри Душанбе иштирок намуданд.
Маросими савгандёдкунӣ бо садо додани Суруди миллӣ ва ворид намудани Байрақи ҷангӣ оғоз гардида, дар қалби ҳар як иштирокчӣ эҳсоси ифтихор аз Ватан ва эҳтиром ба арзишҳои муқаддаси давлатдориро бедор намуд. Наваскарон, ки имрӯз либоси муқаддаси низомӣ ба бар доранд, дар назди халқу давлат Савганди ҳарбиро ёд намуда, қавл доданд, ки барои ҳифзи марзу буми Тоҷикистони соҳибистиқлол, таъмини оромиву субот ва ҳимояи дастовардҳои миллӣ ҳамеша содиқона хизмат хоҳанд кард.
Таъкид гардид, ки хизмати ҳарбӣ барои ҳар як ҷавон мактаби шуҷоат, ҷасорат ва худшиносии миллӣ буда, ҷавонони имрӯз идомадиҳандаи роҳи пуршарафи ҳомиёни Ватан мебошанд. Зикр гардид, ки маҳз бо шарофати сиёсати хирадмандонаи Роҳбарияти олии кишвар ва таваҷҷуҳи пайваста ба соҳаи мудофиа имрӯз шароити хизмат ва таъминоти иҷтимоии хизматчиёни ҳарбӣ сол аз сол беҳтар гардида истодааст.
Дар идомаи чорабинӣ падару модарони сарбозон низ суханронӣ намуда, аз шароити муҳайёгардидаи хизмати ҳарбӣ барои фарзандонашон изҳори қаноатмандӣ намуданд. Онҳо барои дастгириву ғамхориҳои пайваста ба Роҳбарияти олии мамлакат ва масъулини ҷузъу томҳои Қувваҳои Мусаллаҳ миннатдории самимии худро баён намуда, таъкид доштанд, ки фарзандонашон имрӯз бо рӯҳияи баланди ватандӯстӣ ба хизмати Модар–Ватан камар бастаанд.
Дар фарҷоми маросим гузашти низомии ҳайати шахсӣ баргузор гардида, сарбозону афсарони ҷавон бо қадамзании мутантан ва интизоми намунавӣ маҳорату омодагии баланди худро ба ҳозирин намоиш доданд. Гузашти низомӣ ба чорабинӣ шукуҳу шаҳомати хоса бахшида, бозгӯи омодагии ҳомиёни Ватан барои ҳифзи сулҳу субот ва амнияти Тоҷикистони азиз арзёбӣ гардид.
