Наваскарони зимни даъвати баҳории шаҳрвандон ба хизмати ҳарбӣ ҷалбгардидаи қисми ҳарбии 02615 пас аз бомуваффақият сипарӣ намудани курси якмоҳаи наваскарӣ дар назди масъулини ин воҳиди низомӣ, падару модарон ва дигар меҳмонони чорабинӣ савганд ёд намуданд. Маросими савгандёкунии ин гурӯҳи наваскарон бо риояи қоидаи гузаронидани чорабиниҳои низомиён, ки бо садо додани Суруди миллӣ ва ворид кардани Байрақи ҷангӣ оғоз карда мешавад, идома ёфт.
Дар ин рӯз сарбозони навдаъватшуда дар майдони қисми ҳарбӣ саф ороста, барои ботантана ёд намудани Савганди ҳарбӣ омода буданд. Сипас, сарбозони дар саф буда яке пайи ҳам назди афсарон савганд ёд намуданд. Онҳо бо ёд намудани Савганди ҳарбӣ қавл доданд, ки дар иҷрои вазифа ва уҳдадориҳои ҳарбии худ то нафаси охирин содиқ монда, баҳри ҳифзи марзу бум ва пос доштани муқаддасоти Ватан ҳамеша талош мекунанд, ки ин албатта аз рисолати таърихии ҷавонмардони тоҷик бармеояд. Аз ин лиҳоз, бо такя ба таърихи гузашта дар раванди хатару пайомадҳои ҷаҳонишавӣ ва густариши ҷинояткории фаромиллӣ мо ҷавононро мебояд дар таҳкими ваҳдату ягонагӣ ва субботу оромии Тоҷикистон ҳамеша қадамҳои устувор гузошта, савганди садоқат ба Ватан ёд намудаи худро гиромӣ дорем. Ҳамзамон, Савганди ҳарбӣ ҳар як сарбозро водор мекунад, ки давоми хизмати ҳарбӣ бо номуси фарзандӣ ва ғурури ҷавонмардона вазифаи конститутсионии худро сарбаландона адо намояд.
Ҳамин тавр, падару модарон ва афсарон наваскаронро ба муносибати қабули Савганди ҳарбӣ табрик намуда, ба онҳо дар роҳи хизмати Ватан далериву бурдборӣ таманно намуданд. Маросими савгандёдкунии ин гурӯҳи наваскаронро ҳамзамон аҳли фарҳангу ҳунар бо суруду оҳангҳои худ боз ҳам хотирмон гардониданд.
Боқӣ ШАРИФОВ
