Дар қисми ҳарбии 15018-и Ситоди генералии Қувваҳои Мусаллаҳи Ҷумҳурии Тоҷикистон воқеъ дар гарнизони Душанбе чорабинии бошукӯҳи идона ё худ маросими савгандёдкунии наваскарони даъвати тирамоҳии соли ҷорӣ доир гардид, ки он бо ворид гардидани Байрақи ҷангӣ ба майдон ва садо додани Суруди миллӣ оғоз ёфт.
Дар ин чорабинӣ афсарони Ситоди генералӣ, масъулини Мақомоти иҷроияи ҳокимияти давлатии ноҳияи Рӯдакӣ, падару модарон ва дигар наздикону пайвандони наваскарон иштирок доштанд. Дар қисмати асосии чорабинӣ наваскарон дар назди ҳайати меҳмонон ва афсарону сарбозони қисми ҳарбӣ баҳри садоқат ба ин сарзамин ва анҷоми бомуваффақонаи рисолати шаҳрвандии худ дар назди халқу Ватан Савганди ҳарбӣ ёд намуданд.
Қабул намудани Савганди ҳарбӣ ин худ як садоқати мардона аст ва ҷавононро уҳдадор менамояд, ки баҳри муҳофизати марзи муқаддаси сарзамини аҷдодӣ ва ҳифзи дастовардҳои замони истиқлол доимо омода бошанд. Қобили қайд аст, ки ин наваскарон бо як ғурури ҷавонмардӣ аз муҳофизати марзу буми аҷдодӣ ва содиқ будан ба Ватан ифтихор доштанд, ки чунин ифтихору самимият ва дӯст доштани ин Ватан аз ниҳоди ҳар як иштирокчии ин ҷамъомад эҳсос карда мешуд.
Дар робита ба қабули Савганди ҳарбӣ дар ҳаёти ҳар як низомӣ бояд қайд кард, ки аз рӯзҳои аввали шомил шудани ҷавонон ба сафи Қувваҳои Мусаллаҳи кишвар онҳо ба машғулиятҳои бахши “Ҷанговари ҷавон” ҷалб мегарданд. Дар ин давра аз ҷониби афсарони соҳибтаҷриба ба эшон тарзи сафороиву қадамзанӣ, тартиби рӯз дар қисми ҳарбӣ, шиносоӣ бо силоҳу муҳиммоти ҷангӣ ва дигар мавзӯъҳои амсоли ин ҳамаҷониба омӯзонида мешавад.
Пас аз анҷоми қисмати асосии чорабинӣ ё худ савгандёкунии ин гурӯҳи наваскарон масъулини Мақомоти иҷроияи ҳокимияти давлатии ноҳияи Рӯдакӣ ва командири қисми ҳарбӣ ҳайати шахсии наваскарон ва дар симои онҳо тамоми иштирокчиёни ин чорабинии таърихиву хотирмонро ба ифихори қабули Савганди ҳарбӣ табрику муборакбод гуфта, ба онҳо дар роҳи хизмат ба халқу Ватан, ақлу заковати мардона ва дасту бозуи рустамона таманно намуданд.
Ҳамин тавр, ҷамъомади бошукӯҳи савгандёдкунӣ дар ин қисми ҳарбӣ бо гузашти низомии ҳайати шахсӣ аз назди минбар ва ҳайати роҳбарону меҳмонон ба поён расид.
Боқӣ ШАРИФӢ
