Дар қисми ҳарбии 08010-и Қӯшунҳои хушкигарди Қувваҳои Мусаллаҳи Ҷумҳурии Тоҷикистон сарбозони матинирода хизмати ҳатмии ҳарбии худро тибқи даъват пеш бурда истодаанд. Давоми беш аз як моҳи хизмати наваскарии худ дар ин қисми низомӣ онҳо меъёрҳои оинномавӣ ва дигар уҳдадориҳои ҳарбиро аз худ карда, барои ёд намудани Савганди ҳарбӣ омода шудаанд. Акнун Савганди ҳарбӣ ёд мекунанд, то ки ба ҳайси сарбозони комилҳуқуқи Артиши миллӣ тамоми вазифаву уҳдадориҳои ҳарбиву хизматии худро мустақилона иҷро намоянд.
Маросими савгандёдкунии онҳо дар асоси муқаррароти Оиномаи сафороии Қувваҳои Мусаллаҳи мамлакат бо даровардани Байрақи ҷангӣ ва садо додани Суруди миллӣ оғоз гардид.
Ҳамин тавр, ҳар як наваскар дар назди масъулини роҳбарикунандаи навъи қӯшун, афсарони қисми ҳарбӣ ва падару модарон савганд ёд намуда, қавл доданд, ки сарбози содиқу бошарафи Ватан боқӣ монда, натанҳо давоми хизмат балки тамоми умр баҳри таъмини суботу амнияти кишвар кӯшиш мекунанд. Зеро, ҳимояи давлат ва таъмини амнияти мардум ҳамеша вазифаи шаҳрванд, хусусан ҷавонони бонангу ор ва муҳофизони он мебошад. Ин ҷавонон низ маҳз бо дарки ҳамин рисолати фарзандӣ имрӯз хизмати ҳарбиро ихтиёр намудаанду масъулияти дифои марзу буми Ватанро пеша намуданд.
Наваскарон садоқату самимияти худро зери Байрақи ҷангии қисми ҳарбӣ бо баёни ибораи басо ҳам пурифтихори хизмати содиқона ба халқу Ватан нишон дода, бо шараф хондан ба Сарфармондеҳи Олии Қувваҳои Мусаллаҳ изҳор доштанд, ки дар ин роҳи пуршараф ва мояи ифтихору сарфарозӣ қадамҳои устувор мегузоранд ва хизмати масъулиятноки низомиро сарбаландона пеш мебаранд.
Сипас, ҳайати роҳбарикунанда, намояндагони бахшу соҳаҳои гуногуни ҷомеа ва волидону наздикони сарбозон, фарзандони далеру шуҷои Ватанро ба муносибати қабули Савганди ҳарбӣ самимона табрику муборакбод намуда, таъкид доштанд, ки маҳз бо шарофати садоқату ҷасорати касбӣ, фидокориву ҷоннисорӣ ва хизматҳои шабонарӯзии хизматчиёни ҳарбӣ дар сарзамини поки ниёгонамон сулҳу суббот пойдор аст ва имрӯз ҷомеаи кишвар зиндагии осоишта дорад.
Ҷараёни чорабиниро ҳамзамон як гурӯҳи сарбозони қисми ҳарбӣ бо ташкили машқҳои тан ба тан, ки баёнгари ҷасуриву далерӣ ва омодагии доимии онҳо баҳри ҳимояи марзу буми Ватан аст, боз ҳам рангину хотирмон гардонданд
Ҳамин тавр, ҷамъомади тантанавии қабули Савганди ҳарбӣ аз ҷониби гурӯҳи наваскарони даъвати баҳории соли равон дар ин қисми низомии Вазорати мудофиа бо гузашти низомии ҳайати шахсӣ ва таҳти навои оҳангу таронаҳои аҳли ҳунар ба поён расид.
Боқӣ ШАРИФОВ
