Аввали моҳи май дар пойгоҳи як қатор қисму воҳидҳои низомии Артиши миллӣ мустақар дар ҳудуди гарнизонҳои ҷумҳурӣ чорабиниҳои бошукӯҳи савгандёдкунии наваскарони даъвати баҳории соли ҷорӣ доир гардид. Аз ҷумла, ба ин муносибат ва шарафи бузурги ҷавонмардони меҳан пойгоҳи Баталиони таъйиноти махсуси Ситоди генералии Қувваҳои Мусаллаҳи Ҷумҳурии Тоҷикистонро фазои идона фарогир буд.
Чун ҳарвақта чорабинӣ бо сафороии ҳайати шахсӣ, даровардани Байрақи ҷангии қисми ҳарбӣ ба майдони баргузории чорабинӣ ва таҳти садои Суруди миллӣ, ки рамзи ватандорӣ ва давлати мустақили миллӣ мебошад, оғоз гардид.
Сипас, ҳайати шахсии наваскарон бо либоси идона, як навъ силоҳи вобастагардида ба худ бо ҷасорат ва нерӯйи ҷавонмардӣ дар назди ҳайатҳои фармондеҳӣ, афсарону сарбозони ҳамхизмати худ, падару модарон ва пайвандону наздикони хеш ба қабули Савганди ҳарбӣ шурӯъ намуданд.
Онҳо бо эҳсоси волои ватандӯстона ва садоқату самимияти хос ба халқу Ватан матни савгандномаро ба забон оварданд ва қавл доданд, ки ин рисолати бузург ва вазифаи ҷавонмардонаи худро софдилонаву суботкорона иҷро менамоянд ва ба савганди ёднамудаи худ ҷовидона содиқ мемонанд.
Афсарони ҷавон, ки давоми як моҳ ба наваскарон тартибу низоми хизмат, интизоми ҳарбӣ, мавзӯву моҳияти оинномаҳои Қувваҳои Мусаллаҳ ва дар маҷмӯъ курси ибтидоии ҳарбиро омӯзонидаанд, ҳамакнун дар идомаи хизмат низ онҳоро бо чунин самимият дар рӯҳияи садоқат ба халқу Ватан ва омӯзиши нозукиҳои хизмати ҳарбӣ дар ин қисми низомӣ тарбия менамоянд.
Дар идомаи ҷамъомад афсарони олирутбаи Вазорати мудофиаи мамлакат баромад намуда, афзалиятҳои хизмат дар сафи Қувваҳои Мусаллаҳи Ҷумҳурии Тоҷикистон ва муҳиммиятнокии дифо аз марзу буми аҷдодиро ба сарбозон баён намуданд. Ҳамзамон ба онҳо дар иҷрои вазифаҳои бисёр ҳам муҳиму масъулиятнок, ки давоми хизмат онҳоро дар пеш аст, барору комёбиҳо таманно карданд.
Пардару модарон ва худи наваскарон низ дар навбати худ баромад намуда, хизмат дар сафи Қувваҳои Мусаллаҳи мамлакатро муҳимтарин мактаб дар ҳаёти ҷавонон ва дарси садоқату вафодорӣ арзёбӣ намуданд.
Чун самти асосии таъйиноти ин воҳиди низомӣ пеш бурдани амалиётҳои муҳиму масъулиятнок аст, аз ин лиҳоз ҳайати шахсии он ҳамеша пайи такмили донишу таҷриба ва малакаи касбии худ мебошанд. Ташкили намоиши зӯрозмоиҳои тан ба тан дар ин чорабинӣ аз омодагии хуби ҷисмонӣ ва тактикаи ҷангии онҳо гувоҳӣ медод.
Гузашти низомии афсарону сарбозони баталиони таъйиноти махсус, пеш аз ҳама наваскарон, ки дар ин мактаби мардонагӣ таълиму таҷрибаи ҳарбӣ мегиранд ба қисмати расмии чорабинӣ ҳусни анҷом бахшид.
Боқӣ ШАРИФОВ
