Дар Бригадаи ҳамалаовари десантӣ-зарбавии Қӯшунҳои зудамали Қувваҳои Мусаллаҳ низ дар як вақт ду чорабинии муҳиму хотирмон сурат гирифт. Яке гусели сарбозоне, ки муҳлати муайяни хизмати ҳатмии ҳарбиро адо намудаанд ва дуюмин маросими савгандёдкунии наваскарон буд, ки бо иштироки ҳайати фармондеҳии ин навъи қӯшун ва дар фазои идона ташкилу ба роҳ монда шуд.
Ҳайати фармондеҳӣ ва командири қисми низомӣ зимни тақдими билети ҳарбӣ ва нишони десантчӣ ба сарбозони шуҷои ин навъи қӯшун барои хизматҳои содиқонаву бенуқсон ва ба волидонашон дар тарбияи фарзандон изҳори сипосу миннатдорӣ карда, ба онҳо дар зиндагии мустақилона барору комёбиҳоро таманно карданд. Зимни тақдими билетҳои ҳарбӣ ва нишони сарисинагии десантчӣ изҳор гардид, ки онҳо баъди адои хизмати ҳатмии ҳарбӣ дар комиссариатҳои ҳарбии маҳалли зисташон ба қайд гирифта шуда, дар сурати зарурӣ ё худ таҳдиди хатар ба давлат чун десантчиёни ҳақиқӣ барои дифо аз Тоҷикистони азиз ба сафи Қувваҳои Мусаллаҳ ҷалб карда мешаванд. Дар оянда низ барои ҳимояи ҳар порча хоки Ватан саҳми арзанда мегузоранд.
Дар қисмати дуюми чорабинӣ наваскароне, ки дар даъвати тирамоҳии соли равон шомили Бригадаи ҳамалаовари десантӣ-зарбавии Қӯшунҳои зудамали Қувваҳои Мусаллаҳ гардидаанд, ба маркази майдони сафороии қисми низомӣ тантанавор саф ороста, бо даъвати афсарон ва дар назди ҳозирин сатрҳои савганди садоқатмандӣ ба халқу Ватанро ба забон оварданд. Албатта, ҳар як сарбоз дар тамоми умри худ як маротиба савганд ёд карда, қавл медиҳад, ки қонуни асосӣ ва қонунҳои Ҷумҳури Тоҷикистонро қатъӣ риоя менамояд ва то нафаси охирин ба халқи худ содиқ мемонад.
Баъди ёд кардани Савганди ҳарбӣ, ҳар як наваскар сарбози комилҳуқуқи Ватан мегардад ва аз ӯ пеш аз ҳама интизоми баланди ҳарбӣ дар иҷрои вазифаву ӯҳдадориҳои хизматӣ талаб карда мешавад.
Қобили зикр аст, ки Бригадаи ҳамлаовари десантӣ-зарбавии Қӯшунҳои зудамал яке аз нерӯҳои эҳтиётии Сарфармондеҳи Олии Қувваҳои Мусаллаҳ ба ҳисоб рафта, аз рӯйи барномаи тақвиятдодашудаи омодагии ҷангӣ таълиму тарбият дода мешаванд. Дар сурати зарурӣ, дар сафи аввал вазифаҳои муҳими ҷангиро иҷро менамоянд.
Дар ҷараёни ин чорабинӣ ё худ маросими савгандёдкунии наваскарон, аз ҷониби взводи ҳамлаовари десантии бригадаи мазкур, дар назди ҳозирин роҳу усулҳои ҳимояи хеш дар задухӯрдҳои тан ба тан намоиш дода шуд, ки он хеле ҷолиб сурат гирифт.
Баъд аз табрикоту таманиёт, гузашти низомии ҳайати шахсии Бригадаи ҳамалаовари десантӣ-зарбавии Қӯшунҳои зудамал яке аз ороишҳои асосӣ ва анҷомбаши ин чорабинии муҳими сиёсӣ гардид.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
