Собиқадорон гарчанде аз хизматҳои худ замони фаъолият дар ҳайати сохторҳои низомиву мақомоти ҳифзи ҳуқуқи мамлакат қаноатманд ҳам бошанд, вале боз бо ғуруру ифтихори миллӣ ва эҳсосои баланди ватанпарастона дар тарбияи насли муҳофизи ватан саҳми худро мегузоранд. Аз ин ҷост, ки пайваста дар нишасту ҷамъомадҳои худ нақша-чорабиниҳои гуногунро омода намуда, бо ҷалби фаъолони шӯрои собиқадорони ҷангу меҳнат дар муассисаҳои таълимӣ ва пойгоҳи қисму воҳидҳои ҳарбӣ чорабинӣ ва вохӯриву мулоқотҳои судмандро роҳандозӣ менамоянд. Бо ташкили чунин ҷамъомадҳо албатта онҳо назди худ ҳадаф доранд, ки дар заминаи донишҳои касбӣ ва таҷрибаи бойу рангини хеш фарзандони содиқ ба ватан ва муҳофизони воқеии марзу буми онро дар рӯҳияи баланди хизматӣ тарбия намоянд.
Чунин як чорабинӣ дар кафедраи ҳарбии назди Донишгоҳи аграрии Тоҷикистон ба номи Шириншоҳ Шоҳтемур доир гардид, ки зимини он роҳбарияти донишгоҳ, собиқадорони хизмати ҳарбӣ, устодон ва ҳайати афсарону курсантони кафераи ҳарбии назди ин муассисаи олии касбӣ иштирок доштанд.
Дар оғоз роҳбарияти донишгоҳ аз ташкили чунин ҷамъомадҳо ва нақши он дар тарбияи ҳарбӣ-ватанпарастии ҷавонон изҳори назар намуда, таҷрибаи собиқадорони Артиши миллӣ ва ҳар як нафари содиқ ба касбу кори хешро ҳамчун намунаи олии хизмат ба халқу ватан мактаби бузургу омӯхтанӣ арзёбӣ намуданд. Аз ин рӯ, ҷавонони моро зарур аст дар чунин мактабҳои тарбияи ҳаётӣ таълиму таҷриба гирифта, бо номи нек ва сари баланду ифтихори ҷавонмардона ба ватан ва халқи шарафманди хеш хизмат намоянд.
Собиқадорони хизмати ҳарбӣ низ дар баромади худ лаҳзаҳои хизмат ва муваффақияту комёбиҳои кории хешро ба ёд оварда, дар шароити имрӯзаи ҷаҳони муосир ҳушёру зиррак будан ва аз худ намудани донишҳои замонро ба ҳар як ҷавон ҳатмиву зарурӣ арзёбӣ карданд.
Ҷавонон низ дар навбати худ қайд карданд, ки роҳи ибратбахши мардони содиқу тавоноӣ меҳан ва пирони рӯзгордида ҳамчун мактаби таҷриба моро водор менамояд бо бардошти донишу малака дар ҳифзи якпорчагии Тоҷикистони азиз ва тамомияти арзии он хамеша омода бошем.
Афсарони масъули кафедраи ҳарбӣ низ дар баробари дигар баромадкунандагон аз дастовардҳои 30 соли соҳибистиқлолӣ дар кишвар ва пешрафту шукуфоиҳои давлату миллат дар ин давраи кӯтоҳи таърихӣ ёдоварӣ намуда, ин ҳама музаффриятҳоро самараи иттиҳоду сарҷамъӣ ва ваҳдату ягонагии пойдор маънидод карданд. Зимнан таъкид карда шуд, ки дастоварду ободкориҳои ватани маҳбубамон ҳар як нафари моро водор месозад, ки дар ҷодаи фаъолияти худ пуркору бомасъулият бошем ва дар ҳама ҳолат садоқати фарзандии худро нигоҳ дорем.
Боқи Шарифзода
хабарнигор
