Ба Литсейи ҳарбии Вазорати мудофиаи Ҷумҳурии Тоҷикистон тарбиятгирандагон баъд аз хатми синфи 9-уми муассисаҳои таҳсилоти миёнаи умумӣ шомил гардида, тӯли ду сол ба таълиму тарбия фаро гирифта мешаванд.
Давоми таҳсил дар ин муассисаи таълимии ҳарбӣ таълимгирандагони он дар баробари барномаҳои таълимии пешбинигардида барои синфҳои болоии мактабҳои миёнаи уммумӣ, инчунин нахустзинаҳои касби низомиро бо бартариятҳо вобаста ба омӯзиши фанни омодагии дифоии ҳарбӣ ва забонҳои хориҷӣ аз худ менамоянд. Зеро, онҳо пас аз хатми литсейи мазкур ҷиҳати идомаи таҳсил ба донишгоҳу донишкадаҳои олии ҳарбии дохил ва ба хориҷи кишвар фиристонида мешаванд, то ки дар оянда ҳамчун афсарони касбӣ бо гирифтани маълумоти тахассусӣ ва аввалин рутбаи ҳарбии лейтенант дар Вазорати мудофиаи ҷумҳурӣ ва дигар сохторҳои ҳарбии кишвар хизмат намоянд.
Имрӯзҳо ҳайати шахсии Литсейи ҳарбии Вазорати мудофиа низ чун дигар муассисаҳои таҳсилоти умумии Ҷумҳурии Тоҷикистон дар давараи ҷамъбасти соли хониши 2022-2023 қарор доранд. Аз ин рӯ, таълимгирандагон ҳамарӯза бо ёрии афсарон ва устодони хеш барои бо муваффақият супоридани санҷишу имтиҳонҳои аз синф ба синф гузаронӣ ва хатм омодагии ҳамаҷониба мегиранд.
Баъд аз супоридани имтиҳонҳо хатмкунандагоне, ки бо қарори комиссияи мандатии Вазорати мудофиа имконияти таҳсил дар муассисаҳои таҳсилоти олии ҳарбии хориҷи кишварро ба даст меоранд, ҷиҳати омодагии ҳамаҷонибаи онҳо дар мӯҳлатҳои муайянгардида курсҳои иловагии забономӯзӣ ва фанҳои дақиқ ба роҳ монда мешаванд.
Чорабиниҳои вобаста ба қабули довталабони соли таҳсили 2023-2024 бошад, дар ин муассисаи таҳсилоти ибтидоии низомӣ бо маром ҷараён дорад. Тибқи иттилои афсари масъули бахши таълими литсейи мазкур имтиҳонҳои қабул аз панҷ фанни таълимӣ, матиматикаву забони русӣ ба таври хаттӣ, аз фанни физика тариқи шифоҳӣ, аз забону адабиёт бо тарзи суҳбат ва аз тарбияи ҷисмонӣ тибқи меъёрҳои муқарраршуда сурат гирифта, пас аз бо муваффақият супоридани он ва гузаштан аз муоинаи тиббӣ довталабон имкон доранд ба Литсейи ҳарбӣ шомил гарданд ва сифр нахустзинаҳои касби афсариро, ки шарафу ифтихори ҳар як ҷавонмард аст, аз худ намоянд.
Воқеан, қайд кардан ба маврид аст, ки дар заминаи дастгириву таваҷҷӯҳи доимии Сарфармондеҳи Олии Қувваҳои Мусаллаҳ, генерали артиш, мӯҳтарам Эмомалӣ Раҳмон, имрӯз дар Литсейи ҳарбии Вазорати мудофиаи Ҷумҳурии Тоҷикистон ҷиҳати рушду такомули ҳамаҷонибаи таълимгирандагон тамоми шароиту имкониятҳои таҳсил, таълиму тарбия, истироҳату фароғат, варзиш ва амсоли ин фароҳам оварда шудааст.
Б. ШАРИФОВ
