Литсейи ҳарбии Вазорати мудофиаи Ҷумҳурии Тоҷикистон ба номи генерал-майор Мастибек Тошмуҳаммадов шурӯъ аз соли 1999 дар заминаи мактаб-интернати махсуси ҷумхуриявӣ таъсис ёфта, дар самти омода намудани мутахассисони соҳаи низомии кишвар мавқеи хосса дорад. Имрӯзҳо дар Литсейи ҳарбӣ чун дигар мактабҳои миёнаи касбӣ ва олии кишвар қабули довталабон идома дорад. Онҳое, ки ба ин мактаби ҳарбӣ шомил шуданиянд, ҳуҷҷатҳои дохилшавиро тавассути комиссариати ҳарбии маҳалли зисташон пешниҳод менамоянд.
Дар ин бора сардори Литсейи ҳарбӣ полковник И. Юсуфзода баён дошт,ки ҳуҷҷатсупории довталабон идома дорад:«Литсейи ҳарбӣ-муассисаи таҳсилоти миёнаи умумии дорои барномаҳои таълимии иловагие мебошад, ки аз ҷониби Ҳукумати Ҷумҳурии Тоҷикистон дар ҳайати Вазорати мудофиаи Ҷумҳурии Тоҷикистон таъсис дода шуда, ҳадафи тарбияи ҳаматарафа ва ба хизмати ҳарбӣ омода намудани шаҳрвандони ноболиғи ҷинси мардро дорад».
Ҷавонписарони синни 15-16-сола пас аз хатми синфи 9-уми муассисаҳои таҳсилоти миёнаи умумӣ метавонанд, ба Литсейи ҳарбӣ шомил шаванд.
Ҳамзамон, пас аз ташхису муоинаи тиббӣ ва солим баромадан, довталабон аз 5 фан; матиматика, забони русӣ ба таври хаттӣ, физика тариқи шифоҳӣ,забону адабиёти тоҷик бо тарзи суҳбат ва аз тарбияи ҷисмонӣ тибқи меъёрҳои муқарраршуда имтиҳон супорида, шомили Литсейи ҳарбӣ мегарданд.
Қобили қайд аст, ки дар заминаи сиёсати иҷтимоии давлату ҳукумати кишвар, ҳамзамон ғамхории пайвастаи Сарфармондеҳи Олии Қувваҳои Мусаллаҳ, генерали артиш, муҳтарам Эмомалӣ Раҳмон ба оилаҳои камбизоат ва ятимону бепарасторон имтиёзҳо муқаррар гардидааст. Ин аст, ки ҳамасола беш аз бист фисади дохилшавандагони Литсейи ҳарбиро ятимони кул ва бепарасторону камбизоатон ташкил медиҳанд.
Дар маҷмӯъ, метавон гуфт, ки айни ҳол ҳукумати мамлакат ятимону бепарасторонро ҳамчун ҷавонони ояндасози миллат дар тамоми муассисаҳои таълимии кишвар ба омӯзиши илму дониш фаро гирифта, мутахассисони касбиро барои бахшҳои ҳаёти иқтисодиву иҷтимоӣ ва фарҳангию сиёсӣ омода менамояд.
Ин қишри ҷомеа дар муассисаҳои олии касбӣ соҳиби ихтиссоси зарурӣ гардида, бо донишҳои замонавӣ ва навовариҳои илмию техникии низомӣ фаъолияти касбии худро дар сафи Қувваҳои Мусаллаҳ оғоз менамоянд, ки имрӯзҳо хатмкардагони муассисаҳои олии ҳарбӣ аз ҳисоби ятимону бепарасторон дар қисму воҳидҳои ҳарбии Вазорати мудофиа ва дигар навъҳои қӯшуни Қувваҳои Мусаллаҳ ба иҷрои вазифаҳои масъулиятноки низомӣ машғул мебошанд, ки боиси сарфарозист.
Мебояд гуфт, таҳсил дар Литсейи ҳарбӣ ду солро дар бар гирифта, дар ин муддат муҳассилин асосан донишҳои ибтидоии ҳарбиро аз худ менамоянд. Ҳамзамон, дар асоси низомномаи муайяннамудаи Литсейи ҳарбӣ курсантон ғайр аз Донишкадаи ҳарбии Вазорати мудофиаи Ҷумҳурии Тоҷикистон ба омӯзишгоҳҳову донишгоҳҳои олии ҳарбии кишварҳои дӯсту ҳамҷавор низ равон карда мешаванд. Аз ҷумла,ба Федератсияи Русия, ҷумҳуриҳои Ҳиндустон, Қазоқистон, Ӯзбекистон, Озорбойҷон ва Ҷумҳурии мардумии Чин.
Гузашта аз ин, дар ин муассисаи таълимии харбӣ, шароити зарурӣ вобаста ба раванди таълим фароҳам оварда шуда, биноҳои таълимии муҷаҳҳаз бо техникаву техналогияи замонавӣ ва дигар лавозимоти зарурии дарсӣ мавриди баҳрабардории таҳсилгирандагон қарор дорад. Ҳамасола беш аз 150 нафар довталаб ба Литсейи ҳарбӣ шомил гардида,таҳсилро идома медиҳанд.
Хотиррасон мекунем, ки дар ин муассисаи ҳарбии таълимӣ муҳассилин аз рӯйи 16 фан ба таълиму тарбия фаро гирифта мешаванд. Шакли таҳсил дар Литсейи ҳарбӣ рӯзона ба роҳ монда шуда, хароҷоти таҳсили донишомӯзон ба таври ройгон, аз ҳисоби давлат пешбинӣ гардидааст.
Азимҷон БАДАЛОВ
рӯзноманигор
