Агарчӣ ба Донишкадаи ҳарбии Вазорати мудофиа довталабон пас аз хатми пурраи муассисаҳои таҳсилоти миёнаи умумӣ қабул карда шаванд, Литсейи ҳарбии ин ниҳоди қудратии кишвар бошад, тарбиятгирандагони худро баъд аз анҷоми синфи 9-и мактабҳои таҳсилоти миёнаи умумӣ ба таълиму тарбия фаро мегирад.
Чорабиниҳо вобаста ба қабули довталабони солҳои таҳсили 2024-2025 дар ин муассисаи таҳсилоти миёнаи низомӣ аллакай оғоз гардида, имрӯзҳо бо маром ҷараён дорад. Довталабоне, ки хоҳиши шомил гардидан ба Литсейи ҳарбиро доранд, метавонанд омодагии аввалини худро дар комиссариатҳои ҳарбии маҳалли зисти хеш гирифта, дархости таҳсил ва ҳуҷҷатҳои лозимаро пешниҳод намоянд.
Довталабон барои дохилшавӣ ба Литсейи ҳарбӣ, пеш аз ҳама аз омӯзиш ва комиссияи аввалини тиббӣ дар комиссариатҳои ҳарбии шаҳру ноҳияҳои кишвар гузашта, дар раванди қабул пас аз гузаштан аз комиссияи ниҳоии ҳарбӣ-тиббӣ ва супоридани имтиҳонҳо сазовори номи тарбиятгирандаи Литсейи ҳарбӣ мегарданд.
Тибқи иттилои масъулини Литсейи ҳарбӣ имтиҳонҳои қабул аз панҷ фанни таълимӣ сурат гирифта, пас аз бомуваффақият супоридани он ва гузаштан аз муоинаи тиббӣ довталабон имкон доранд ба литсейи мазкур шомил гарданд ва аз сифр нахустзинаҳои касби афсариро, ки шарафу ифтихори ҳар як ҷавонмард аст, аз худ намоянд.
Ин нукта маврид ба зикр аст, ки дар заминаи сиёсати иҷтимоии давлату ҳукумат ва ғамхории ҳамешагии Пезиденти мамлакат муҳтарам Эмомалӣ Раҳмон нисбат ба оилаҳои камбизоату ниёзманди ҷомеа дар Литсейи ҳарбӣ барои қабули довталабони ятиму бепарастор имтиёзҳо муайян гардидааст.
Қобили қайд аст, ки таҳсил дар Литсейи мазкур ду сол давом намуда, дар ин муддат хонандагон асосан донишҳои ибтидоии ҳарбиро аз худ менамоянд. Дар асоси низомномаи муайяннамудаи Литсейи ҳарбӣ курсантони лаёқатманд ҷиҳати идомаи таҳсил ба омӯзишгоҳҳо ва Донишгоҳҳои олии ҳарбии давлатҳои ба мо ҳампаймон фиристода шуда, қисми дигар бошанд ба Донишкадаи ҳарбии Вазорати мудофиа дохил мегарданд.
Дар заминаи дастгириву таваҷҷӯҳи доимии Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш, муҳтарам Эмомалӣ Раҳмон, имрӯз дар Литсейи ҳарбии Вазорати мудофиа ҷиҳати рушду такомули ҳамаҷонибаи таълимгирандагон тамоми шароиту имкониятҳои таҳсил, таълиму тарбия, истироҳату фароғат, варзиш ва амсоли ин фароҳам оварда шудааст. Аз ҷумла, бинову синфхонаҳои таълимӣ, майдончаи қадамзаниву сафороӣ, толорҳои маҷлисӣ, китобхона бо теъдоди зиёди китобҳо, хобгоҳ бо хонаҳои фароғативу хизмати майишӣ, ошхонаи кушоду барҳаво ва дигар нуқтаҳои хизматӣ дар Литсейи мазкур бо шароити мусоид ва имкониятҳои ҳозиразамони хизмат ва таълиму тарбия фароҳам оварда шудаанд.
Ба рӯҳияи болида, сифати баланди таълиму тарбия ва сатҳи хуби омодагии ҷисмонии тарбиятгирандагон низ дар ин муассисаи низомӣ аҳамияти аввалиндараҷа дода мешавад. Ин аст, ки ҷиҳати татбиқи амалии барномаҳои давлатии қабулгардида дар соҳаи варзиш ва бо мақсади обу тоби ҷисмонии ҳайати шахсӣ давоми солҳои охир дар Литсейи ҳарбӣ як қатор иншооти гуногуни соҳавӣ, аз ҷумла толору майдончаҳои варзишӣ сохта ба истифода дода шудааст ва он ба таври васеъ мавриди баҳрабардорӣ қарор дорад.
Бояд хотиррасон кард, ки Литсейи ҳарбии Вазорати мудофиа Ҷумҳурии Тоҷикистон аз соли 1999 дар базаи мактаб-интернати махсуси ҷумҳуриявӣ, ки он 29-уми сентиябри соли 1985 таъсис ёфта буд, ташкил гардидааст. Литсейи мазкурро метавон пойдевори Артиши миллӣ дар самти омодакунии мутахасисони низомии мамлакат номид. Ин аст, ки имрӯзҳо садҳо нафар курсантони хатмнамудаи Литсейи ҳарбӣ баъди таҳсил ва хатми мактабҳои олии ҳарбӣ дар қисму воҳидҳои низомии Қувваҳои Мусаллаҳи мамлакат ва дигар сохторҳои қудратӣ адои вазифа менамоянд.
Боқӣ ШАРИФОВ,
майор
