Дар асоси нақша-чорабиниҳои пешаздаъватии Вазорати мудофиаи Ҷумҳурии Тоҷикистон дар машқгоҳи «Лоҳур»-и қисми ҳарбии 08010-и Қӯшунҳои хушкигарди Қувваҳои Мусаллаҳ курси якмоҳаи сержантӣ ташкил ва баргузор гардид.
Ин иқдом ба баланд бардоштани сатҳи омодагии касбӣ ва тайёр намудани мутахассисони хурди низомӣ равона гардида яке аз тадбирҳои муҳим ба ҳисоб меравад.
Мақсади асосии баргузор намудани курси мазкур омода намудани сержантҳои соҳибтаҷриба ва баланд бардоштани маҳорати роҳбарии ҳайати хурди фармондеҳӣ мебошад. Дар ин курс сарбозоне ҷалб гардиданд, ки аз тамоми қисму воҳидҳои низомии навъи қӯшунҳо интихоб шуда, зиёда аз 6 моҳ таҷрибаи хизмати ҳарбиро доштанд. Барномаи таълимӣ фарогири дарсҳои назариявӣ ва машқҳои амалӣ буда, иштирокчиён донишҳои худро дар самтҳои омодагии ҷангӣ, тактикӣ, интизоми ҳарбӣ ва малакаҳои роҳбарӣ такмил доданд.
Лозим ба ёдоварист, ки чунин курс бори аввал аз ҷониби Вазорати мудофиаи Ҷумҳурии Тоҷикистон бо ҷалби мутахассисони хурди низомӣ аз қисмҳои ҳарбии ҳарбии навъҳои қӯшуни Артиши миллӣ розандозӣ карда шуда, чунин курсҳои таълими сержантӣ то ин дам дар пойгоҳи қисму воҳидҳои низомӣ ба таври алоҳидагӣ ташкилу гузаронида мешуд.
Пас аз анҷоми давраи якмоҳаи омӯзиш, аз ҷониби афсарони масъули соҳа аз сарбозон тариқи шифоҳӣ ва бо истифода аз билетҳои имтиҳонӣ санҷиши ниҳоӣ гузаронида шуда, иштирокчиён бо нишон додани сатҳи баланди дониш ва омодагӣ, бо баҳои қаноатбахш ва хуб ин курсро ба анҷом расониданд.
Маросими супоридани шаҳодатномаҳо бо иштироки намояндагони Вазорати мудофиаи мамлакат дар фазои тантанавӣ дар майдони сафороии машқгоҳи Лоҳур баргузор гардида, дар ҷараёни ин чорабинӣ хатмкунандагон соҳиби шаҳодатнома гардиданд.
