Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 28-уми декабри соли 2023 зимни ироаи Паёми навбатии худ ба Маҷлиси Олии Ҷумҳурии Тоҷикистон соли 2024-ро “Соли маърифати ҳуқуқӣ” эълон намуданд. Иқдоми мазкур агар аз як тараф ба муносибати таҷлил аз 30-юмин солгарди қабули Конститутсияи Ҷумҳурии Тоҷикистон бошад, аз ҷониби дигар бо мақсади баланд бардоштани донишҳои ҳуқуқии сокинон ва огоҳии ҳарчӣ бештари онҳо аз Конститутсия ва дигар қонунҳо роҳандозӣ гардидааст.
Ин аст, ки барои дар амал татбиқ намудани ин иқдоми саривақтӣ дар тамоми вазорату идораҳо ва муассисаҳои таълимӣ пайваста конфронсу нишастҳо ва вохӯриву ҷаласаҳо гузаронида мешавад.
Бо ин мақсад дар “Кохи афсарон”-и Вазорати мудофиаи мамлакат Конференсияи ҷумҳуриявӣ баргузор гардид. Муовини вазири мудофиа, генерал-майор Музаффар Раҳимзода зимни ифтитоҳи конференсия баргузории онро муҳим ва афзалиятнок арзёбӣ намуда, меҳмононро хайрамақдам гуфт.
Дар конференсияи мазкур намояндагон аз Суди Олии Ҷумҳурии Тоҷикистон, Донишкадаи такмили ихтисоси Вазорати адлияи Ҷумҳурии Тоҷикистон, Раёсати кадрҳо ва таълимоти ҳарбии Вазорати мудофиаи мамлакат, Академияи Вазорати корҳои дохилии Ҷумҳурии Тоҷикистон, Донишкадаи олии сарҳадии Кумитаи давлатии амнияти миллии Ҷумҳурии Тоҷикистон, Донишкада ва Литсейи ҳарбии Вазорати мудофиа ва Донишгоҳи миллии Тоҷикистон иштирок намуданд.
Иштирокчиён зимни баромади худ дар мавзӯъҳои “Нақши Конститутсияи Ҷумҳурии Тоҷикистон дар ташаккули маърифати ҳуқуқӣ”, “Маърифати ҳуқуқӣ ва шуури ҳуқуқӣ-пойдории риояи ҳуқуқҳои инсон ва шаҳрванд”, “Сатҳи баланди ҳуқуқдонӣ-кафолати рушди кишвар”, “Баланд бардоштани маърифати ҳуқуқии кишвар-вазифаи махсуси мақомоти корҳои дохилӣ: таҳлилӣ ва назариявӣ илмӣ”, “Шуури ҳуқуқӣ ва заминаҳои деформатсияи он”, “Мақоми ҳуқуқи низоъҳои мусаллаҳона дар маърифати ҳуқуқии хизматчиёни ҳарбӣ”, “Ҷинояту ҷинояткорӣ дар байни ҷавонону ноболиғон ва саҳми омӯзгор дар пешгирии он” ва “нақши маърифати ҳуқуқӣ дар баланд бардоштани маърифати ҳуқуқии ҷомеа” маърӯзаҳои пурмазмун намуданд.
Бояд тазаккур дод, ки баланд бардоштани маърифати ҳуқуқии шаҳрвандон яке аз вазифаҳои муҳимтарин ва нахустдараҷаи кишварҳое маҳсуб меёбад, ки роҳи бунёди давлати демократӣ ва ҳуқуқбунёдро пеш гирифтаанд. Дар моддаи якуми Конститутсияи амалкунанда хусусиятҳои соҳибихтиёрӣ, демократӣ, ҳуқуқбунёд, дунявӣ ва ягонагии Ҷумҳурии Тоҷикистон дарҷ гардидааст. Арзишҳои номбурда собит месозанд, ки давлат дар пояи қонун ва ҳуқуқ бунёд ёфта, рушди давлати демократӣ, ҳуқуқбунёд ва дунявӣ ба сатҳи дониш ва маърифати ҳуқуқии аҳолӣ вобастагии зиёд дорад.
Ҳамзамон, ҳамин гуна конференсия дар Раёсати Қӯшунҳои зудамали Қувваҳои Мусаллаҳи Ҷумҳурии Тоҷикистон низ бо иштироки намояндагон аз Суди конститутсионии Ҷумҳурии Тоҷикистон, Сарпрокуратураи ҳарбии Ҷумҳурии Тоҷикистон, Раёсати мубориза бар зидди ҷиноятҳои муташаккили Вазорати корҳои дохилӣ, Раёсати танзими анъана ва ҷашну маросими Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон, Раёсати назорати муомилоти нашъаовар ва пешгирии нашъамандии Агентии назорати маводи нашъаовари назди Президенти Ҷумҳурии Тоҷикистон, Кумитаи телевизион ва радио, Кумитаи кор бо занон ва оилаи назди Ҳукумати мамлакат, Маркази тадқиқоти стратегии назди Президенти Ҷумҳурии Тоҷикистон, агентии назорати давлатии молиявӣ ва мубориза бо коррупсия, Кумитаи давлатии амнияти миллии Ҷумҳурии Тоҷикистон ва афсарону сарбозони ин навъи қӯшун гузаронида шуд.
Қайд кардан ба маврид аст, ки ҳадаф ва мавзуву муҳтавои асосии конференсияи мазкур оид ба амалӣ намудани дастуру супоришҳои Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон оид ба эълон намудани соли 2024 “Соли маърифати ҳуқуқӣ”, таҳлилу баррасии суханронии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқот бо фаъолон, намояндагони ҷомеа ва ходимони дини кишвар, “Барномаи давлатии муқовимат бо ҷинояткорӣ дар Ҷумҳурии Тоҷикистон барои солҳои 2021-2030”, “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030, барои марҳилаи якум (солҳои 2021-2025)”, “Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025”, мубориза бар зидди гардиши ғайриқонунии маводи мухаддир дар Ҷумҳурии Тоҷикистон, амалинамоии қонунҳои Ҷумҳурии Тоҷикистон “Дар бораи танзими анъана ва ҷашну маросими миллии Ҷумҳурии Тоҷикистон” ва “Дар бораи масъулияти падару модар дар таълиму тарбияи фарзанд” равона гардида буд.
Дар фарҷоми конференсия иштирокчиён барои пешниҳоди маърӯзаҳои пурмазмун ва баррасии амиқи мавзӯъҳои муҳим бо сипоснома ва ифтихорномаҳо қадрдонӣ гардиданд.
Шоҳин ШАРИФОВ,
рӯзноманигор
